ប្រទេសអាល្លឺម៉ង់កំពុងដឹកនាំសមយុទ្ធយោធាដ៏ធំមួយ ដែលផ្តោតលើការចល័តកងទ័ព និងគ្រឿងយុទ្ធោបករណ៍ទៅកាន់ប្រទេសលីទុយអានី ខណៈភាពតានតឹងជាមួយរុស្ស៊ី នៅប៉ែកខាងកើតនៃព្រំដែនអង្គការណាតូ (NATO) នៅតែមានកម្ដៅ។

ថ្នាក់ដឹកនាំយោធាអាល្លឺម៉ង់ បានចូលរួមជាមួយឯកអគ្គរដ្ឋទូតនៃបណ្ដាប្រទេសបាល់ទិក និងមន្ត្រីមកពីប្រទេសផ្សេងទៀត នៅកំពង់ផែ Rostock កាលពីថ្ងៃព្រហស្បតិ៍ (ទី៤ ខែកញ្ញា) ដើម្បីមើលស្រឡាងដែលផ្ទុកដោយរថយន្តយោធាចាកចេញពីកំពង់ផែឆ្ពោះទៅកាន់ទីក្រុង Klaipeda របស់លីទុយអានី អមដំណើរការពារដោយនគរបាល នាវាចម្បាំងជំនាន់ចាស់ នាវាស្វែងរកកម្ចាត់មីន និងឧទ្ធម្ភាគចក្រ។

ជាមួយគ្នានេះ អ្នកជំនាញខាងយោធាក៏បានបង្ហាញផងដែរពីយុទ្ធវិធីស្ទាក់ចាប់ដ្រូន ទាំងនៅលើអាកាស និងនៅលើទឹក ហើយយន្តហោះចម្បាំង Eurofighter បានហោះពីលើកំពង់ផែនេះ។

សមយុទ្ធនេះមានឈ្មោះថា Quadriga ស្ថិតនៅក្រោមការដឹកនាំរបស់កងទ័ពជើងទឹកអាល្លឺម៉ង់ និងអង្គភាពផ្សេងៗ ដែលកងទ័ព និងកងទ័ពអាកាស ក៏កំពុងចូលរួមផងដែរ។ ការហ្វឹកហាត់នេះមានអ្នកបុគ្គលិកជាង ៨.០០០នាក់ មកពី ១៤ប្រទេស។ វារួមបញ្ចូលសម្ព័ន្ធមិត្តរបស់អង្គការណាតូទាំងអស់ដែលមានព្រំដែនតាមបណ្ដោយឆ្នេរសមុទ្របាល់ទិក ព្រមទាំងសហរដ្ឋអាមេរិក ចក្រភពអង់គ្លេស បារាំង និងកាណាដា។ ហើយយោធាអាល្លឺម៉ង់ ឲ្យដឹងថា នាវា ៤០គ្រឿង យន្តហោះ ២០គ្រឿង និងយានយន្តលើដីជាង ១.៨០០គ្រឿង កំពុងចូលរួមក្នុងការហាត់សមនេះ។

គួរបញ្ជាក់ថា ប្រទេសអាល្លឺម៉ង់កំពុងពង្រឹងផ្នែកយោធារបស់ខ្លួន បន្ទាប់ពីបានធ្វើមិនដឹងមិនឮជាច្រើនឆ្នាំ ហើយកាលខែឧសភា បានបើកសម្ពោធកងពលតូចមួយ នៅប្រទេសលីទុយអានីដែលមានព្រំប្រទល់ជាប់តំបន់ Kaliningrad របស់រុស្ស៊ី និងបេឡារុសដែលជាសម្ព័ន្ធមិត្តរបស់ទីក្រុងមូស្គូ ខណៈដែលក្ដីបារម្ភ អំពីការឈ្លានពានរបស់រុស្ស៊ី នៅតែមានមិនទាន់បាត់៕