ការិយាល័យរបស់លោកស្រី Giorgia Meloni បានឲ្យដឹងថា លោកស្រីនាយករដ្ឋមន្ត្រី កាលពីថ្ងៃព្រហស្បតិ៍ (ទី៤ ខែកញ្ញា) បានរំលឹកឡើងវិញទៅកាន់សម្ព័ន្ធមិត្តថា ប្រទេសអ៊ីតាលីនឹងមិនបញ្ជូនទាហានទៅអ៊ុយក្រែននោះទេ ប៉ុន្តែខ្លួនអាចជួយតាមដានពិនិត្យកិច្ចព្រមព្រៀងសន្តិភាពដែលអាចកើតមានណាមួយ។

ការិយាល័យនេះ បានឲ្យដឹងថា លោកស្រី Meloni បានចូលរួមក្នុងកិច្ចប្រជុំកំពូលនៃសម្ព័ន្ធ «ឆន្ទៈរួម» គាំទ្រអ៊ុយក្រែន តាមរយៈវីដេអូ ដោយលោកស្រី «បានបញ្ជាក់ម្តងទៀតពីឆន្ទៈរបស់អ៊ីតាលី ក្នុងការបញ្ជូនកងទ័ពទៅអ៊ុយក្រែន។ ហើយលោកស្រី Meloni បានអះអាងពីការបើកចំហររបស់លោកស្រី ក្នុងការគាំទ្រដល់លទ្ធភាពនៃការមានបទឈប់បាញ់ ជាមួយនឹងគំនិតផ្តួចផ្តើមតាមត្រួតពិនិត្យ និងការបណ្តុះបណ្តាល នៅខាងក្រៅព្រំដែនអ៊ុយក្រែន»។

បើយោងតាមលោកស្រី Meloni បានឲ្យដឹងថា អ៊ីតាលីបានស្នើឲ្យបង្កើតយន្តការសន្តិសុខសមូហភាពដែលត្រូវបានបំផុសគំនិតដោយមាត្រា៥ នៃសន្ធិសញ្ញាទីក្រុងវ៉ាស៊ីនតោន ដែលជាធាតុសំខាន់នៃការធានានយោបាយ សម្រាប់អ៊ុយក្រែន។

បន្ទាប់ពីបញ្ចប់កិច្ចប្រជុំនោះ លោកស្រីនាយករដ្ឋមន្ត្រីបានសន្ទនាតាមទូរសព្ទជាមួយប្រធានាធិបតីអាមេរិក លោក Donald Trump ដែលភាគីទាំង២ បានបញ្ជាក់ពីការឯកភាពគ្នា ក្នុងការសម្រេចបាននូវសន្តិភាពដ៏ត្រឹមត្រូវ និងយូរអង្វែង សម្រាប់អ៊ុយក្រែន។

គួរបញ្ជាក់ផងដែរថា យោងតាមសម្ដីរបស់ប្រធានធិបតីអ៊ុយក្រែន លោក Volodymyr Zelenskyy ក្នុងអំឡុងសន្និសីទសារព័ត៌មាន នៅវិមាន Elysee របស់បារាំង បានឲ្យដឹងថា លោក និងមេដឹកនាំអឺរ៉ុប បន្ទាប់ពីកិច្ចប្រជុំនៃ «សម្ព័ន្ធឆន្ទៈរួម» នោះ បានពិភាក្សាជាមួយប្រធានាធិបតីអាមេរិក លោក Trump អំពីការដាក់សម្ពាធលើរុស្ស៊ី ដើម្បីបង្ខំឲ្យបញ្ចប់សង្រ្គាម៕