ប្រទេសអារ៉ាប់រួម (UAE) បានព្រមានអ៊ីស្រាអែលថា ការសម្រេចណាមួយ ក្នុងការដាក់ទឹកដីប៉ាឡេស្ទីនជាឧប    សម្ព័ន្ធរបស់ប្រទេសនេះ នឹងឆ្លង«បន្ទាត់ក្រហម» និងធ្វើឲ្យតំបន់នេះមានអស្ថិរភាព ដោយបញ្ជាក់ពីការគាំទ្ររបស់អារ៉ាប់រួមចំពោះភាពជារដ្ឋប៉ាឡេស្ទីន ទោះបីជាមានទំនាក់ទំនងធម្មតាជាមួយអ៊ីស្រាអែល ក្នុងប៉ុន្មានឆ្នាំថ្មីៗនេះ ក៏ដោយ។

ទីភ្នាក់ងារសារព័ត៌មានអារ៉ាប់រួម (WAM) បានរាយការណ៍ថា លោក Khalifa Shaheen Al-Marar រដ្ឋ   មន្ត្រីការបរទេសរបស់ UAE បានបញ្ជាក់ពីជំហររបស់ប្រទេសនេះ  កាលពីថ្ងៃព្រហស្បតិ៍ បន្ទាប់ពីការបញ្ចប់នៃសម័យប្រជុំលើកទី ១៦៤ នៃក្រុមប្រឹក្សារដ្ឋមន្ត្រីការបរទេសអារ៉ាប់។

ការព្រមាននេះ ត្រូវបានផ្សព្វផ្សាយនៅក្នុងសារព័ត៌មាន បន្ទាប់ពីសេចក្តីថ្លែងការណ៍ដែលធ្វើឡើងដោយបេសកជនពិសេសរបស់អារ៉ាប់រួមលោក Lana Nusseibeh នៅក្នុងបទសម្ភាសន៍ជាមួយសារព័ត៌មាន Times of Israel កាលពីដើមសប្តាហ៍នេះ។

លោក Al-Marar បាននិយាយថា៖ «ការដាក់តំបន់វេសបែង ឬផ្នែកណាមួយនៃទឹកដីប៉ាឡេស្ទីនជាឧបសម្ព័ន្ធរបស់អ៊ីស្រាអែល នឹងឆ្លងបន្ទាត់ក្រហម ហើយការចាត់វិធានការបែបនេះ នឹងបំផ្លាញសន្តិសុខក្នុងតំបន់»។ 

លោកបាននិយាយថា អារ៉ាប់រួម ប្តេជ្ញាការពារសិទ្ធិប៉ាឡេស្ទីន និងបន្តដំណោះស្រាយរដ្ឋពីរ ជាផ្លូវតែមួយគត់ ដែលអាចសម្រេចបានសន្តិភាពដ៏ទូលំទូលាយមួយ៕