ទីភ្នាក់ងារការពារជនស៊ីវិលនៅតំបន់ហ្កាហ្សា បាននិយាយថា មនុស្ស ១៩នាក់ ត្រូវបានសម្លាប់ នៅថ្ងៃសុក្រនេះ នៅក្នុងការវាយប្រហារជាបន្តបន្ទាប់របស់អ៊ីស្រាអែល នៅក្នុង និងជុំវិញទីក្រុងហ្កាហ្សា ដែលយោធាអ៊ីស្រាអែលគ្រោង នឹងដណ្តើមយកគ្រប់គ្រង។

អ្នកនាំពាក្យរបស់ទីភ្នាក់ងារការពារជនស៊ីវិល លោក Mahmud Bassal បាននិយាយថា ការវាយប្រហារនោះ បានត្រូវចំអគារ និងតង់លំនៅឋានដែលជាជម្រករបស់ប្រជាជនហ្កាហ្សាដែលត្រូវជម្លៀស នៅតាមសង្កាត់ជាច្រើន និងនៅជាយក្រុង ដែលអង្គការសហប្រជាជាតិនិយាយថា មនុស្សជាងមួយលាននាក់ កំពុងប្រឈមនឹងគ្រោះទុរ្ភិក្ស។

ដោយត្រូវទាក់ទងដោយសារព័ត៌មាន AFP យោធាអ៊ីស្រាអែល បានស្នើសុំពេលវេលា និងការសម្របសម្រួល ដើម្បីធ្វើអត្ថាធិប្បាយលើឧប្បត្តិហេតុជាក់លាក់។

អ៊ីស្រាអែលបានបង្កើនការវាយប្រហាររបស់ខ្លួន ទៅលើទីក្រុងហ្កាហ្សា ព្រោះតែបាននិយាយថា ខ្លួននឹងបើកការវាយលុកពេញបន្ទុក ដើម្បីកាន់កាប់ទីក្រុងនេះ។ អ្នកនាំពាក្យកងទ័ពលោក Nadav Shoshani បាននិយាយកាលពីថ្ងៃព្រហស្បតិ៍ថា ការចាប់ផ្តើមនៃយុទ្ធនាការនេះ នឹងមិនត្រូវបានប្រកាសទេ ដើម្បីរក្សា ការសម្ងាត់៕