នាយករដ្ឋមន្ត្រី Donald Tusk បានប្រាប់អ្នកយកព័ត៌មាន បន្ទាប់ពីកិច្ចប្រជុំនៃអ្វីដែលហៅថា សម្ព័ន្ធនៃឆន្ទៈ នៅទីក្រុងប៉ារីសថា ប្រទេសប៉ូឡូញ នឹងទាមទារការធានាសន្តិសុខពីដៃគូរបស់ខ្លួន ដែលជាផ្នែកមួយនៃគំនិតផ្តួចផ្តើម ដើម្បីការពារដែនអាកាសអ៊ុយក្រែន។ 

លោក Tusk បាននិយាយក្នុងអំឡុងសន្និសីទនៅលើយន្តហោះរបស់ខ្លួន មុនពេលចាកចេញពីទីក្រុងប៉ារីស ដូចដែលផ្សាយដោយទូរទស្សន៍ TVP Infoថា៖«ខ្ញុំបានជូនដំណឹងដល់ដៃគូរបស់យើងថា ប៉ូឡូញចាប់អារម្មណ៍ក្នុងការធានាថា ដែនអាកាសអ៊ុយក្រែនមានសុវត្ថិភាព ប៉ុន្តែនេះត្រូវតែភ្ជាប់មកជាមួយការធានាសម្រាប់សន្តិសុខរបស់ប្រទេសប៉ូឡូញផងដែរ។ លោកបានសង្កត់ធ្ងន់ថា៖« យើងមិនអាចកាត់បន្ថយកម្រិតសន្តិសុខរបស់យើងតាមមធ្យោបាយណាមួយបានទេ ហើយដៃគូរបស់យើង ត្រូវតែចងចាំរឿងនេះ» ដោយបន្ថែមថា អ្នកជំនាញប៉ូឡូញ នឹងចូលរួមក្នុងការពិភាក្សាអំពីគំនិតផ្តួចផ្តើមនេះ»។

កាលពីថ្ងៃទី ០៤ ខែកញ្ញា សមាជិកនៃសម្ព័ន្ធនៃឆន្ទៈ បានជួបប្រជុំគ្នានៅទីក្រុងប៉ារីស ដើម្បីពិភាក្សាអំពីការធានាសន្តិសុខសម្រាប់អ៊ុយក្រែន ក្នុងចំណោមបញ្ហាផ្សេងៗទៀត។ យោងតាមប្រធានាធិបតីបារាំងលោក អេម៉ានុយអែល ម៉ាក្រុង (Emmanuel Macron) ពេលនេះ សម្ព័ន្ធនៃឆន្ទៈ មានសមាជិក ចំនួន ៣៥ប្រទេស ដែលក្នុងនោះ ២៦ក្នុងចំណោមនោះ បានសម្តែងការត្រៀមខ្លួន ក្នុងការបញ្ជូនកងកម្លាំងយោធា ទៅកាន់អ៊ុយក្រែន នៅពេលដែលបទឈប់បាញ់ ឬកិច្ចព្រមព្រៀងសន្តិភាព ត្រូវបានបង្កើតឡើង៕