សភារបស់ប្រទេសថៃ បានជ្រើសរើសលោក Anutin Charnvirakul ដែលជាមេដឹកនាំគណបក្ស Bhumjaithai (ភូមិចៃថៃ) វ័យ ៥៨ឆ្នាំ ធ្វើជានាយករដ្ឋមន្ត្រីបន្ទាប់។ តើលោក Anutin គឺជានរណា? មុនពេលត្រូវបានបោះឆ្នោតឲ្យកាន់តំណែងជាប្រមុខរដ្ឋាភិបាល បន្ទាប់ពីមានការបណ្តេញលោកស្រី Paetongtarn Shinawatra ចេញពីតួនាទី កាលពីសប្តាហ៍មុន ក្រោយតុលាការធម្មនុញ្ញ បានរកឃើញថា លោកស្រីបានបំពានច្បាប់ក្រមសីលធម៌។

Bhumjaithai គឺជាគណបក្សធំទី២ នៅក្នុងរដ្ឋាភិបាលចម្រុះដែលកំពុងកាន់អំណាចដឹកនាំដោយគណបក្ស Pheu Thai (ភឿថៃ) របស់លោកស្រី Paetongtarn ដែលនៅពេលនោះ លោក Anutin ជាឧបនាយករដ្ឋមន្ត្រី។ លោក Anutin បានដកខ្លួនចេញពីក្រុមចម្រុះនេះ កាលពីខែមិថុនា មុនមានការសម្រេចរបស់តុលាការធម្មនុញ្ញ។

គណបក្សប្រឆាំង គឺ People's Party (បក្សប្រជាជន) ដែលមានអាសនៈជិត ១ភាគ៣ នៃសភាជាន់ទាប និងជាគណបក្សធំជាងគេ នៅក្នុងសភា បានឲ្យដឹងថា ខ្លួននឹងគាំទ្រលោក Anutin ធ្វើជានាយករដ្ឋមន្ត្រី ជាថ្នូរនឹងការសន្យាព្រមរំលាយសភា ក្នុងរយៈពេល ៤ខែ។ តែគណបក្សប្រជាជន នឹងមិនចូលរួមជាមួយរដ្ឋាភិបាលទេ។

លោក Anutin ចាប់ផ្តើមប្រឡូកក្នុងឆាកនយោបាយជាមួយបក្ស Thai Rak Thai ជាគណបក្សដែលបង្កើតឡើងដោយឪពុករបស់លោកស្រី Paetongtarn គឺលោក Thaksin Shinawatra (ថាក់ស៊ីន ស៊ីណាវ៉ាត់)។ លោកបានបម្រើការក្រោមការដឹកនាំរបស់លោក ថាក់ស៊ីន រយៈពេលខ្លី ជាអនុរដ្ឋមន្ត្រីសុខាភិបាលក្នុងឆ្នាំ២០០៤ និងបន្ទាប់មកជាអនុរដ្ឋមន្ត្រីក្រសួងពាណិជ្ជកម្ម នៅចុងឆ្នាំ២០០៤ មុនពេលវិលមកផ្នែកសុខាភិបាលវិញ នៅឆ្នាំ២០០៥។

លោកត្រូវបានហាមមិនឲ្យធ្វើនយោបាយរយៈពេល ៥ឆ្នាំ ក្រោយគណបក្ស Thai Rak Thai ត្រូវបានរំលាយនៅឆ្នាំ២០០៧។ លោកបានត្រលប់មកវិញ ក្នុងនាមជាមេដឹកនាំគណបក្ស Bhumjaithai ក្នុងឆ្នាំ២០១២។ លោកធ្វើជារដ្ឋមន្ត្រីសុខាភិបាល ក្នុងអំឡុងពេលមានជំងឺរាតត្បាតកូវីដ-១៩ ដោយត្រួតពិនិត្យការបិទខ្ទប់ ការផ្គត់ផ្គង់វ៉ាក់សាំង និងការព្យាបាល។ ហើយលោកបានកាន់តំណែងជារដ្ឋមន្ត្រីក្រសួងមហាផ្ទៃ ក្នុងរដ្ឋាភិបាលដឹកនាំដោយបក្ស Pheu Thai តាំងពីឆ្នាំ២០២៣។ លោក Anutin ស្និទ្ធនឹងរបបរាជានិយម ដែលថ្មីៗនេះ បានអមដំណើរព្រះមហាក្សត្រ Maha Vajiralongkorn ក្នុងព្រះរាជដំណើរទស្សនកិច្ច ៤ថ្ងៃទៅកាន់ប្រទេសប៊ូតង់ កាលពីខែមេសា ហើយបានចាត់ទុកខ្លួនលោកថា ជាផ្នែកនៃសន្តតិវង្សនយោបាយក្នុងតំបន់ និងស្ថាប័នរាជានិយម-អភិរក្សនិយម។

ដោយមានឈ្មោះហៅក្រៅថា Noo ជាភាសាថៃ គឺសត្វកណ្តុរ លោកគឺជាកូនប្រុសរបស់ លោក Chavarat Charnvirakul ជាពាណិជ្ជករផងអ្នកនយោបាយផង ដែលធ្លាប់ធ្វើជានាយករដ្ឋមន្ត្រីចាំផ្ទះ។ លោកគឺជាអ្នកស្នងមរតកក្រុមហ៊ុនសំណង់របស់គ្រួសារ គឺ Stecon Group ដែលបានសាងសង់អគាររដ្ឋសភា នៅទីក្រុងបាងកក។ លោក Anutin បានទទួលសញ្ញាប័ត្រផ្នែកវិស្វកម្មឧស្សាហកម្មពីសាកលវិទ្យាល័យ Hofstra University ក្នុងទីក្រុងញូវយ៉ក សហរដ្ឋអាមេរិក៕