ប្រធានាធិបតីអ៊ុយក្រែន លោក Volodymyr Zelenskyy បាននិយាយថា លោកនឹងជួបជាមួយប្រធានក្រុមប្រឹក្សាអឺរ៉ុប លោក Antonio Costa និងនាយករដ្ឋមន្ត្រីស្លូវ៉ាគី លោក Robert Fico ក្នុងទីក្រុងគីវ នៅថ្ងៃសុក្រ (ទី៥ ខែកញ្ញា) នេះ ដើម្បីពិភាក្សាអំពីបញ្ហាថាមពល។

អនុរដ្ឋមន្ត្រីថាមពលអ៊ុយក្រែន លោក Roman Andarak បាននិយាយនៅក្នុងទីក្រុង Copenhagen នៅថ្ងៃសុក្រនេះថា លោក Zelenskyy ត្រូវបានគេរំពឹងថា នឹងពិភាក្សាពីដំណាក់កាលនៃការចែកចាយប្រេងរបស់រុស្ស៊ី តាមរយៈអ៊ុយក្រែនជាមួយលោក Fico ក្នុងអំឡុងពេលមានកិច្ចប្រជុំរបស់ពួកលោក។

ស្លូវ៉ាគីពឹងផ្អែកខ្លាំងលើការផ្គត់ផ្គង់ប្រេងពីរុស្ស៊ីតាមរយៈបំពង់បង្ហូរប្រេង Druzhba ដែលហេដ្ឋារចនាសម្ព័ន្ធរបស់បំពង់នេះត្រូវបានយានដ្រូនរបស់អ៊ុយក្រែនវាយប្រហារនាពេលថ្មីៗនេះ បណ្តាលមានការរំខានម្តងហើយម្តងទៀតដល់ការផ្គត់ផ្គង់ ដែលបង្កឲ្យមានប្រតិកម្មខឹងសម្បាពីទីក្រុង Bratislava។

អ៊ុយក្រែនដែលប្រយុទ្ធនឹងការឈ្លានពានទ្រង់ទ្រាយរបស់រុស្ស៊ី តាំងពីខែកុម្ភៈ ឆ្នាំ២០២២ បានអំពាវនាវម្តងហើយម្តងទៀតដល់ប្រទេសផ្សេងទៀតឲ្យបញ្ឈប់ទិញប្រេងពីរុស្ស៊ី ដើម្បីធ្វើឲ្យក្រុងមូស្គូអស់ថវិកាផ្គត់ផ្គង់ធ្វើសង្រ្គាម៕