​WHO៖ ប្រធាន​អង្គការ​សុខភាព​ពិភពលោក​បាន​ព្រមាន​ថា ​លក្ខខណ្ឌ​នៅតែ​ជា​គំរូ​សម្រាប់​វីរុស​ប​ម្លែ​ង​ខ្លួន​ថ្មី​នៃ​វីរុស​ឆ្លង COVID-19 ដែល​លេចចេញ​កាន់តែ​ច្រើន​ឡើង ហើយ​វា​ជា​គ្រោះថ្នាក់​ក្នុង​ការ​សន្មត​ថាវីរុស​រាតត្បាត​បញ្ចប់​។ លោក Tedros Adhanom Ghebreyesus និយាយ​ថា ដំណាក់កាល​ធ្ងន់ធ្ងរនៃ​ជំងឺ​រាតត្បាត​អាច​នៅតែ​បញ្ចប់​វា​បាន​នៅ​ឆ្នាំនេះ ប្រសិនបើ​គោលដៅ​សំខាន់ៗ​មួយ​ចំនួន​ត្រូវ​បាន​បំពេញ​។

ប្រធាន​អង្គការ​សុខភាព​ពិភពលោក​បានដាក់​ចេញ​គោលដៅ និង​កង្វល់​ជាច្រើន​នៅក្នុងផ្នែក​សុខភាព​ពិភពលោក ​ជុំវិញ​បញ្ហា​ដូចជាការកាត់បន្ថយ​ការប្រើប្រាស់​ថ្នាំជក់ ការប្រយុទ្ធប្រឆាំង​ភាពធន​ចំពោះ​ការព្យាបាល​ប្រឆាំង​មេរោគ និង​ហានិភ័យ​នៃ​បម្រែបម្រួល​អាកាសធាតុ​លើ​សុខភាពមនុស្ស​។​ ​ទោះជា​យ៉ាងណា​លោក​បាន​និយាយថា​ ការបញ្ចប់​ដំណាក់កាល​ស្រួចស្រាវនៃ​ជំងឺ​រាតត្បាត​ ត្រូវតែ​នៅជា​អាទិភាពរួម​។ ​លោក​ Tedros បាន​ទទូចថា​ យើង​អាច​បញ្ចប់​វីរុស COVID-19 ជាការ​សង្គ្រោះបន្ទាន់​ផ្នែក​សុខភាពសកល ​ហើយ​យើង​អាចធ្វើ​វា​បាននៅ​ឆ្នាំនេះ​ដោយ​ឈានទៅដល់​គោលដៅ ដូចជា​គោលដៅ​របស់អង្គការ​សុខភាព​ពិភពលោក​ ក្នុង​ការចាក់​វ៉ាក់សាំង ៧០% នៃ​ចំនួន​ប្រជា​ជន​ក្នុងប្រទេស​នីមួយៗនៅ​ពាក់កណ្តាល​ឆ្នាំនេះ ជាមួយនឹង​ការ​ផ្តោតលើ​មនុស្ស​ដែលមាន​ហានិភ័យ​ខ្ពស់បំផុត​នៃ​វីរុស COVID-19 និង​ជំរុញ​ការធ្វើ​តេស្ត​ដើម្បី​តាមដាន​វីរុស និង​វីរុស​ប​ម្លែ​ង​ខ្លួន​ថ្មី​ដែល​កំពុង​លេចចេញ​។​

​លោក​និយាយថា វា​ជា​ការពិត​ដែល​យើង​នឹង​រស់នៅ​ជាមួយ​វីរុស COVID សម្រាប់​អនាគត​ដ៏​ខ្លី​ខាងមុខ ប៉ុន្តែ​ការរៀន​រស់នៅ​ជាមួយ​វីរុស COVID-19 មិនអាច​មានន័យថា យើង​ទទួលយក​អ្នកស្លាប់​ជិត ៥ម៉ឺន​នាក់​ក្នុង​មួយ​សប្តាហ៍​ពី​ជំងឺ​ដែល​អាច​ការពារ និង​ព្យាបាល​បាន​នោះទេ​។ លោក Tedros បាន​អំពាវ​នាវ​ឱ្យមាន​ការពង្រឹង​អង្គការ​សុខភាព​ពិភពលោក និង​ការបង្កើន​មូលនិធិ​សម្រាប់​ស្ថាប័នដើម្បី​ជួយ​ទប់ទល់​វិបត្តិ​សុខភាព៕

អត្ថបទ៖ ប៊ុនថន