អាជ្ញាធរអន្តោប្រវេសន៍របស់សហរដ្ឋអាមេរិក បានអនុវត្តដីកាឆែកឆេររបស់តុលាការនៅរោងចក្រ Hyundai ក្នុងរដ្ឋចចា ដោយបានឃុំខ្លួនមនុស្ស៤៧៥នាក់។ រោងចក្រដ៏ធំទូលាយមួយនេះគឺជាទីតាំងដែលក្រុមហ៊ុនផលិតរថយន្តប្រទេសកូរ៉េខាងត្បូងផលិតរថយន្តអគ្គិសនី។

លោក Steven Schrank ភ្នាក់ងារពិសេសទទួលបន្ទុកផ្នែកស៊ើបអង្កេតសន្តិសុខមាតុភូមិ បាននិយាយនៅក្នុងសន្និសីទសារព័ត៌មានកាលពីថ្ងៃសុក្រថា ភាគច្រើននៃអ្នកដែលត្រូវបានឃុំខ្លួនគឺមកពីប្រទេសកូរ៉េខាងត្បូង។ លោក Schrank បាននិយាយថា «ប្រតិបត្តិការនេះបញ្ជាក់ពីការប្តេជ្ញាចិត្តរបស់យើងចំពោះការងារសម្រាប់ប្រជាជននៅរដ្ឋចចា និងពលរដ្ឋអាមេរិកទាំងអស់។

អ្នកនាំពាក្យក្រសួងការបរទេសកូរ៉េខាងត្បូងលោក Lee Jaewoong បានពណ៌នាចំនួនពលរដ្ឋកូរ៉េខាងត្បូងដែលត្រូវបានឃុំខ្លួនថាមានចំនួន «ច្រើន» ទោះបីជាលោកពុំបានផ្តល់តួលេខពិតប្រាកដក៏ដោយ។

ការឆ្មក់បង្ក្រាបកាលពីថ្ងៃព្រហស្បតិ៍បានកំណត់គោលដៅមួយក្នុងចំណោមរោងចក្រផលិតធំបំផុត និងល្បីល្បាញបំផុតនៅរដ្ឋចចា ដែលត្រូវបានសរសើរដោយអភិបាលរដ្ឋនិងមន្ត្រីដទៃទៀតថាជាគម្រោងអភិវឌ្ឍន៍សេដ្ឋកិច្ចធំបំផុតនៅក្នុងប្រវត្តិសាស្ត្ររបស់រដ្ឋនេះ។

សេតវិមានបាននិយាយកាលពីថ្ងៃសុក្រថា រដ្ឋបាលរបស់លោក Trump បាននិយាយថា ខ្លួននឹងអនុវត្តច្បាប់ដែលតម្រូវឱ្យកម្មករបរទេសមានការអនុញ្ញាតត្រឹមត្រូវក្នុងការស្នាក់នៅក្នុងសហរដ្ឋអាមេរិក បន្ទាប់ពីការឆ្មក់បង្ក្រាបនៅរដ្ឋចចា។

លោកប្រធានាធិបតី Trump នឹងបន្តផ្តល់ការសន្យារបស់លោកដើម្បីធ្វើឱ្យសហរដ្ឋអាមេរិកក្លាយជាកន្លែងដ៏ល្អបំផុតនៅក្នុងពិភពលោកក្នុងការធ្វើអាជីវកម្ម ខណៈកំពុងអនុវត្តច្បាប់អន្តោប្រវេសន៍សហព័ន្ធ។