ក្រសួងឧតុនិយមរបស់ប្រទេសថៃ បានព្រមានពីភ្លៀងធ្លាក់ខ្លាំងនៅទូទាំងខេត្តចំនួន៤៣ដោយជំរុញឱ្យប្រជាជនមានការប្រុងប្រយ័ត្នខ្ពស់ចំពោះទឹកជំនន់ដ៏គំហុកនិងទឹកហូរដែលបណ្តាលមកពីប្រព័ន្ធភ្លៀងមូសុងដ៏ខ្លាំងក្លាបោកបក់នៅពាសពេញប្រទេស។

ប្រទេសថៃកំពុងបន្តប្រឈមហានិភ័យនៃទឹកធ្លាក់ភ្លៀងខ្លាំងនៅពាសពេញតំបន់ភាគកណ្តាល តំបន់ភាគឦសាន ព្រមទាំងតំបន់ភាគខាងត្បូង ហើយអាចនឹងបង្កឱ្យមានទឹកជំនន់។

ក្រសួងឧតុនិយមថៃ បានរាយការណ៍ថា តំបន់ភាគខាងជើង ភាគឦសាន ភាគកណ្តាល និងភាគនិរតី របស់ប្រទេសថៃ កំពុងស្ថិតក្រោមឥទ្ធិពលនៃភ្លៀងមូសុង ដូច្នេះភ្លៀងធ្លាក់ខ្លាំង ត្រូវបានព្យាករថា នឹងកើតមានលើតំបន់ទាំងនោះ រួមទាំងនៅទីក្រុងបាងកក និងតំបន់នៅជុំវិញនោះ។

បន្ថែមលើនេះ រដ្ឋបាលមូលដ្ឋាន ស្ថាប័ននិងទីភ្នាក់ងារពាក់ព័ន្ធបានសហការគ្នាពិនិត្យកម្លាំងទំនប់ទឹក និងរបាំងការពារទឹកជំនន់ ដើម្បីការពារកុំឱ្យទឹកហៀរចេញ។ ក្រុមមន្ត្រីក៏ត្រូវបានណែនាំឱ្យរៀបចំឧបករណ៍សង្គ្រោះគ្រោះមហន្តរាយ និងគ្រឿងចក្រដើម្បីផ្តល់ជំនួយដល់សាធារណជន ២៤ម៉ោង ក្នុងមួយថ្ងៃ។