អធិការបតីអាល្លឺម៉ង់ Friedrich Merz បានសារភាពថា ពេលនេះ អឺរ៉ុបមិនអាចដើរតួនាទី ក្នុងកិច្ចការពិភពលោក ដែលខ្លួនចង់បានទេ។  

លោកបានកត់សម្គាល់ថា អឺរ៉ុបកំពុងព្យាយាមរួបរួមគ្នា ហើយអាល្លឺម៉ង់ជាប្រទេសធំជាងគេរបស់អឺរ៉ុប កំពុងដើរតួនាទីយ៉ាងសំខាន់ក្នុ ងកិច្ចខិតខំប្រឹងប្រែងទាំងនេះ។ ទោះយ៉ាងណាក៏ដោយ តាមការលើកឡើងរបស់លោក លទ្ធភាពរបស់អឺរ៉ុបសម្រាប់សកម្មភាពឯករាជ្យមានកម្រិត។ លោកបានលើកឡើងពីវិបត្តិអ៊ុយក្រែនជាឧទាហរណ៍មួយដែលអឺរ៉ុប ខ្វះអានុភាព ដើម្បីទទូចលើលក្ខខណ្ឌដំណោះស្រាយដែលខ្លួនចង់បាន។

លោកបាននិយាយនៅក្នុងបទសម្ភាសន៍ជាមួយបណ្តាញ YouTube នៃគណបក្សរបស់លោកគឺគណបក្សសហភាពប្រជាធិបតេយ្យគ្រីស្ទានថា៖«យើងពឹងផ្អែកលើជំនួយរបស់អាមេរិក។ យើងឃើញថា ប្រទេសចិន ប្រេស៊ីល និងប្រទេសផ្សេងទៀត មានអារម្មណ៍ថា មានសេរីភាពក្នុងទំនាក់ទំនងរបស់ពួកគេជាមួយរុស្ស៊ី ជាមួយនឹងទម្រង់ដែលហៅថា ទម្រង់សៀងហៃ (អង្គការសហប្រតិបត្តិការសៀងហៃ) លេចចេញជាភាពជាដៃគូថ្មី។ ខ្ញុំត្រូវតែទទួលស្គាល់ថា ខ្ញុំមានការព្រួយបារម្ភចំពោះការពិតដែលថា ក្នុងនាមជាជនជាតិអឺរ៉ុបឥឡូវនេះ យើងមិនអាចដើរតួ ដែលយើងចង់បាននោះទេ ហើយគួរតែធានាផលប្រយោជន៍របស់យើង»។

នេះជាការឆ្លើយតបរបស់លោកចំពោះការអះអាងថា លោកផ្តោតខ្លាំងលើនយោបាយបរទេស។ លោកបានទទួលស្គាល់ថា សកម្មភាពនយោបាយការបរទេសរបស់លោក គឺជាគោលដៅនៃការរិះគន់ នៅក្នុងប្រទេសអាល្លឺម៉ង់។ លោកបានបន្ថែមថា៖«ប៉ុន្តែអធិការបតីអាល្លឺម៉ង់មួយរូប នឹងមិនធ្វើការងាររបស់ខ្លួនឲ្យបានត្រឹមត្រូវទេ ប្រសិនបើលោក ឬលោកស្រី មិនសកម្មស្មើគ្នា ក្នុងកិច្ចការបរទេស អឺរ៉ុប និងកិច្ចការក្នុងស្រុក ដើម្បីធានាជីវិតសន្តិភាព សេរីភាព និងវិបុលភាព ក្នុងប្រទេសនេះទេ៕