យោធាអ៊ីស្រាអែលបានទម្លាក់ខិត្តប័ណ្ណកាលពីថ្ងៃសៅរ៍លើទីក្រុងហ្កាហ្សា បញ្ជាឲ្យជនប៉ាឡេស្ទីនចាកចេញទៅកាន់តំបន់ភាគខាងត្បូង ពេលដែលកងកម្លាំងរបស់ពួកគេរុលចូលកាន់តែជ្រៅទៅក្នុងតំបន់ទីក្រុងធំបំផុតនៅក្នុងដែនដីមួយនេះ ។

កងកម្លាំងអ៊ីស្រាអែល បានបើកការវាយប្រហាររបស់ពួកគេលើតំបន់ជាយក្រុងនៅទីក្រុងភាគខាងជើងមួយនេះ អស់រយៈពេលជាច្រើនសប្តាហ៍មកហើយ ក្រោយនាយករដ្ឋមន្រ្តីអ៊ីស្រាអែលលោក Benjamin Netanyahu បញ្ជាឲ្យយោធាដណ្តើមកាន់កាប់ទីក្រុងមួយនេះ ។

លោក Netanyahu និយាយថា ទីក្រុងហ្កាហ្សា គឺជាតំបន់កាន់កាប់របស់ក្រុមហាម៉ាស ហើយការដណ្តើមគ្រប់គ្រងវា សំខាន់ចាំបាច់ ដើម្បីយកឈ្នះក្រុមជីវពលអ៊ិស្លាមប៉ាឡេស្ទីនមួយនេះ ដែលការវាយប្រហារកាលពីខែតុលា ឆ្នាំ ២០២៣របស់ពួកគេលើអ៊ីស្រាអែល បង្កឲ្យកើតមានសង្រ្គាម ។

ការវាយប្រហារនេះដែរ គំរាមកំហែងជម្លៀសជនប៉ាឡេស្ទីនរាប់ម៉ឺននាក់ ដែលជ្រកកោននៅទីនោះ ដោយសារសង្រ្គាមរយៈពេលជិត ២ឆ្នាំមកហើយ ។ មុនពេលសង្រ្គាមផ្ទុះឡើង មនុស្សប្រហែល ១លាននាក់ ដែលស្មើនឹងជិតពាក់កណ្តាលនៃពលរដ្ឋសរុបនៅតំបន់ហ្កាហ្សា បានរស់នៅក្នុងទីក្រុងមួយនេះ ។

មនុស្សភាគច្រើននៅក្នុងទីក្រុងហ្កាហ្សា ត្រូវបានជម្លៀសខ្លួន ពេលសង្រ្គាមផ្ទុះឡើងដំបូង ដោយក្រោយមក ពួកគេបានវិលត្រឡប់មកទីនេះវិញ ។ ពលរដ្ឋមួយចំនួននិយាយថា ពួកគេសូមបដិសេធន៍ពុំជម្លៀសខ្លួនម្តងទៀតនោះទេ ។

យោធាអ៊ីស្រាអែល បានបើកការវាយប្រហារយ៉ាងធ្ងន់ធ្ងរលើទីក្រុងហ្កាហ្សា អស់រយៈពេលជាច្រើនសប្តាហ៍មកហើយ ដោយរុលចូលតំបន់ជាយក្រុងក្រៅៗជាច្រើនកន្លែង ហើយក្នុងសប្តាហ៍នេះ កងកម្លាំងរបស់ពួកគេ ស្ថិតនៅចម្ងាយប៉ុន្មានគ.មប៉ុណ្ណោះពីមជ្ឈមណ្ឌលទីក្រុង ៕