ប្រធានាធិបតីអ៊ុយក្រែន លោក Volodymyr Zelenskiy បាននិយាយកាលពីថ្ងៃសៅរ៍ (៦ កញ្ញា) ថា តួលេខជិត ៦០% នៃសព្វាវុធដែលប្រើប្រាស់ដោយយោធាអ៊ុយក្រែន ត្រូវបានផលិតក្នុងស្រុក ដែលលើសពីគោលដៅបានកំណត់កាលពីពីរខែមុន។

នៅក្នុងសុន្ទរកថាពេលយប់របស់ខ្លួន លោក Zelenskiy បាននិយាយថា៖ អំឡុងសង្រ្គាមនេះ អ៊ុយក្រែនបានឈានដល់ចំណុចដែលខិតទៅជិត ៦០% នៃសព្វាវុធដែលខ្លួនមាន គឺជាអាវុធដែលនៅក្នុងដៃទាហានគីវ ហើយទាំងនោះសុទ្ធតែអ៊ុយក្រែនផលិតដោយខ្លួនឯង»។ 

លោក Zelenskiy និងក្រុមមន្ត្រីផ្សេងទៀតបានសង្កត់ធ្ងន់ជាយូរមកហើយលើការជំរុញផលិតកម្មអាវុធក្នុងស្រុក ដែលជាធាតុសំខាន់ក្នុងការធានាការការពារអនាគតរបស់អ៊ុយក្រែន។ នៅក្នុងសុន្ទរកថានោះ លោកក៏បានលើកពីគម្រោងរួមគ្នាមួយដើម្បីអនុវត្តការផលិតអាវុធនៅក្នុងប្រទេសដាណឺម៉ាកផងដែរ។

កាលពីខែកក្កដា ប្រធានាធិបតីអ៊ុយក្រែនរូបនេះបានអំពាវនាវដល់រដ្ឋាភិបាលដែលទើបរុះរើថ្មីរបស់លោក ឱ្យចាត់វិធានការជំរុញការផលិតអាវុធនៅអ៊ុយក្រែន លើសពី ៥០% ។ អ៊ុយក្រែនបានផ្តោតលើការផលិតដ្រូន និងខែលការពារដែនអាកាស ដើម្បីទប់ទល់នឹងការវាយប្រហារដ៏ខ្លាំងក្លាពីដ្រូន និងមីស៊ីលរបស់រុស្ស៊ី លើទីក្រុងនានារបស់ខ្លួន៕