ព្យុះភ្លៀង និងផ្គររន្ទះយ៉ាងខ្លាំងក្លា បានបោកបក់ពាសពេញផ្នែកខ្លះនៃភាគឦសានសហរដ្ឋអាមេរិក នៅរសៀលថ្ងៃសៅរ៍ (៦ កញ្ញា) ដោយធ្វើឱ្យមនុស្សជាង ២៥លាននាក់ ស្ថិតនៅក្រោមការព្រមានឱ្យមានការប្រុងប្រយ័ត្ន។ សេចក្ដីណែនាំពីព្យុះ ត្រូវបានដាក់ចេញសម្រាប់ផ្នែកខ្លះនៃភាគឦសាន ចាប់ពីរដ្ឋ Maryland ទៅដល់រដ្ឋ Maine រហូតដល់ម៉ោងក្នុងស្រុក ៨យប់ថ្ងៃដដែលនោះ។

ប្រព័ន្ធផ្សព្វផ្សាយក្នុងស្រុករាយការណ៍ថា គ្រោះថ្នាក់ចម្បងណាមួយដែលកើតឡើងពីព្យុះផ្គររន្ទះ អាចមានកម្រិតធ្ងន់ធ្ងរណាស់ ដែលភាគច្រើនអាចមានឥទ្ធិពលបំផ្លិចបំផ្លាញខ្លាំង លាយឡំនឹងខ្យល់កន្ត្រាក់។ លទ្ធភាពនៃសំណុំទឹកកកធំៗ និងព្យុះកួចរយៈពេលខ្លី ក៏អាចកើតមាន ជាពិសេសសម្រាប់ទីតាំងនៅភាគខាងជើងនៃរដ្ឋ New England ដែលរួមបញ្ចូលនៅក្នុងការព្រមាន។

សេវាអាកាសធាតុជាតិនិយាយថា ខ្យល់កន្ត្រាក់ សំណុំទឹកកកធំៗ និងផ្លេកបន្ទោរអាចកើតមាននៅព្រលប់ថ្ងៃសៅរ៍ ពេញមួយយប់នៅទូទាំងតំបន់នេះ ហើយទឹកជំនន់យ៉ាងគំហុកក៏នឹងក្លាយជាក្តីបារម្ភផងដែរ សម្រាប់តំបន់មួយចំនួន ជាមួយនឹងហានិភ័យខ្ពស់បំផុត (កម្រិត២ នៃប្រព័ន្ធមាន ៤កម្រិត) ដែលលាតសន្ធឹងពីទីក្រុង Philadelphia ទៅដល់ Bridgeport ក្នុងរដ្ឋ Connecticut ។

សេវាអាកាសធាតុជាតិបានបន្ថែមទៀតថា ភ្លៀងធ្លាក់ខ្លាំងជាច្រើនជុំត្រួតគ្នា និងព្យុះកម្រិតស្រាល ក៏អាចនាំឱ្យមានទឹកជំនន់យ៉ាងគំហុក ជាពិសេសជាមួយនឹងភ្លៀងធ្លាក់ខ្លាំងក្លាបំផុត ឬអាចកើតនៅតំបន់ដែលងាយមានទឹកជំនន់៕