សហរដ្ឋអាមេរិក៖ មន្ទីរបញ្ចកោណបាននិយាយថា រដ្ឋមន្ត្រីក្រសួងការពារជាតិសហរដ្ឋអាមេរិកលោក Lloyd Austin បានដាក់ទាហានរហូតដល់ ៨.៥០០នាក់លើការប្រុងប្រយ័ត្នខ្ពស់ ដូច្នេះពួកគេនឹងត្រៀមដាក់ពង្រាយ ប្រសិនបើចាំបាច់ដើម្បីធានាដល់សម្ព័ន្ធមិត្តអង្គការ NATO ក្នុងការប្រឈមមុខទៅនឹងការឈ្លានពានរបស់ប្រទេសរុស្សី នៅតាមព្រំដែនប្រទេសអ៊ុយក្រែន។
រដ្ឋមន្ត្រីព័ត៌មានរបស់មន្ទីរបញ្ចកោណលោក John Kirby បាននិយាយថា គ្មានការសម្រេចចិត្តថ្មីណាមួយត្រូវបានធ្វើឡើងលើការដាក់ពង្រាយនោះទេ។ លោកនិយាយថា បទបញ្ជានេះគឺការធានាបានថា សហរដ្ឋអាមេរិកត្រៀមខ្លួនជាស្រេចក្នុងការឆ្លើយតប ប្រសិនបើអង្គការណាតូសម្រេចដាក់ពង្រាយកម្លាំងឆ្លើយតបរបស់ខ្លួន។ ប្រទេសរុស្ស៊ីបានដាក់ពង្រាយកងទ័ពប្រមាណ ១០០,០០០នាក់នៅជិតព្រំដែនប្រទេសអ៊ុយក្រែន ដោយទាមទារឱ្យអង្គការណាតូសន្យាថា ខ្លួននឹងមិនអនុញ្ញាតឱ្យប្រទេសអ៊ុយក្រែនចូលរួមក្នុងអង្គការនេះឡើយ ហើយសកម្មភាពផ្សេងទៀតដូចជាការដាក់មូលដ្ឋានកងទ័ពសម្ព័ន្ធមិត្ត នៅក្នុងបណ្ដាប្រទេសអតីតប្លុកសហភាពសូវៀតត្រូវបានកាត់បន្ថយ។
ប្រទេសដាណឺម៉ាកកំពុងបញ្ជូននាវាចម្បាំង និងដាក់ពង្រាយយន្តហោះចម្បាំង F-16 ទៅកាន់ប្រទេសលីទុយអានី ហើយប្រទេសអេស្ប៉ាញកំពុងបញ្ជូនយន្តហោះចម្បាំង ៤គ្រឿងទៅកាន់ប្រទេសប៊ុលហ្គារី និងនាវា ៣គ្រឿងទៅកាន់សមុទ្រខ្មៅ ដើម្បីចូលរួមជាមួយកងកម្លាំងកងទ័ពជើងទឹករបស់អង្គការណាតូ។ បារាំងបានត្រៀមបញ្ជូនកងទ័ពទៅកាន់ប្រទេសរូម៉ានី ហើយប្រទេសហូឡង់ក៏មានផែនការបញ្ជូនយន្តហោះចម្បាំង F-35 ចំនួន ២គ្រឿងទៅកាន់ប្រទេសប៊ុលហ្គារីចាប់ពីខែមេសា៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
