នាយករដ្ឋមន្ត្រីជប៉ុន លោក Shigeru Ishiba បានប្រកាសលាលែងពីតំណែងកាលពីថ្ងៃអាទិត្យ (៧ កញ្ញា) ដែលជំរុញឱ្យមានការប្រកួតប្រជែងថ្នាក់ដឹកនាំថ្មីនៅក្នុងបក្សប្រជាធិបតេយ្យសេរី LDP របស់លោក ដោយអ្នកឈ្នះក៏ត្រូវប្រឈមនឹងការបោះឆ្នោតសភាផងដែរ ដើម្បីក្លាយជានាយករដ្ឋមន្ត្រី។ មានបេក្ខភាពលេចធ្លោ ៥រូប ដែលគេមើលឃើញថាអាចប្រជែងតំណែងកំពូលមួយនេះបាន។

បេក្ខភាពទីមួយ មកពីបក្ស LDP ដែលកំពុងកាន់អំណាច គឺលោកស្រី Sanae Takachi វ័យ ៦៤ឆ្នាំ ហើយប្រសិនបើត្រូវជ្រើសរើសពិតមែន នោះលោកស្រី Takaichi នឹងក្លាយជានាយករដ្ឋមន្ត្រីស្ត្រីដំបូងគេរបស់ជប៉ុន។ បេក្ខភាពទីពីរមកពីបក្ស LDP ដដែលគឺលោក Shinjiro Koizumi វ័យ ៤៤ឆ្នាំ ជាកូនប្រុសរបស់អតីតនាយករដ្ឋមន្ត្រី Junichiro Koizumi ដែលធ្លាប់មានភាពលេចធ្លោក្នុងនយោបាយជប៉ុនអស់ជាងមួយសតវត្សរ៍ ហើយបើត្រូវជ្រើសរើស លោក Koizumi នឹងក្លាយជានាយករដ្ឋមន្ត្រីវ័យក្មេងបំផុតរបស់ជប៉ុនក្នុងសម័យទំនើបនេះ។

អ្នកទីបីក៏មកពីបក្ស LDP ផងដែរគឺលោក Yoshimasa Hayashi វ័យ ៦៤ឆ្នាំ ជាប្រធានគណៈរដ្ឋមន្ត្រីជប៉ុន ដែលជាការងារដ៏សំខាន់មួយ រួមមានការធ្វើជាអ្នកនាំពាក្យជាន់ខ្ពស់របស់រដ្ឋាភិបាលចាប់តាំងពីខែធ្នូ ឆ្នាំ២០២៣ ក្រោមការដឹកនាំរបស់អតីតនាយករដ្ឋមន្ត្រី Fumio Kishida និងលោក Ishiba ។

បេក្ខភាពទី៤ មកពីក្រុមប្រឆាំងកណ្តាលនិយមឆ្វេង គឺបក្សប្រជាធិបតេយ្យរដ្ឋធម្មនុញ្ញជប៉ុន លោក Yoshihiko Noda វ័យ៦៨ឆ្នាំ ដែលជាអតីតនាយករដ្ឋមន្ត្រីជប៉ុន និងជាមេដឹកនាំក្រុមប្រឆាំងដ៏ធំបំផុតមួយនេះ។ បេក្ខភាពចុងក្រោយមកពីបក្សប្រឆាំងកណ្តាលនិយមស្តាំមួយទៀត គឺបក្សប្រជាធិបតេយ្យដើម្បីប្រជាជន លោក Yuichiro Tamaki វ័យ ៥៦ឆ្នាំ ដោយបក្សរបស់លោក ជាបក្សមួយក្នុងចំណោមបក្សដែលមានការរីកចម្រើនលឿនបំផុតក្នុងការបោះឆ្នោតនាពេលថ្មីៗនេះ។

សូមបញ្ជាក់ថា ដោយសារតែក្រុមចម្រុះដឹកនាំដោយបក្ស LDP ដែលកំពុងកាន់អំណាចរបស់ជប៉ុន បានបាត់បង់សំឡេងភាគច្រើនក្នុងសភាទាំងពីរ ដូចនេះប្រធានបក្ស LDP មិនត្រូវបានធានាថានឹងក្លាយជានាយករដ្ឋមន្ត្រីថ្មីទៀតនោះទេ ហើយក៏មានលទ្ធភាពតិចតួចដែរ ដែលប្រធានបក្សប្រឆាំងអាចជាដណ្ដើមបានតំណែងកំពូលមួយនេះ៕