ប្រជាជនរាប់ពាន់នាក់នៅក្នុងរដ្ឋធានី Culiacan នៃរដ្ឋSinaloa ប្រទេសម៉ិកស៊ិក បានចេញធ្វើបាតុកម្មកាលពីថ្ងៃអាទិត្យ ទី៧ ខែកញ្ញា ដើម្បីទាមទារឱ្យបញ្ចប់ការកើនឡើងអំពើហិង្សាទាក់ទងនឹងគ្រឿងញៀន ដែលបានរួមរឹតតំបន់នេះចាប់តាំងពីការចាប់ខ្លួនស្តេចគ្រឿងញៀនដ៏ល្បីឈ្មោះ លោក Ismael 'El Mayo' Zambada កាលពីឆ្នាំមុន។

ការចាប់ខ្លួន លោក Zambada ដែលត្រូវបានធ្វើបត្យាប័នទៅកាន់សហរដ្ឋអាមេរិកបន្ទាប់ពីតាមដែលចោទប្រកាន់ថាបានក្បត់ដោយមនុស្សជំនិតរបស់លោក បានធ្វើឱ្យសង្គ្រាមកាន់តែខ្លាំងឡើងក្នុងចំណោមក្រុមជួញដូរគ្រឿងញៀនដែលប្រជែងគ្នាដើម្បីគ្រប់គ្រង។ មហន្តរាយបានប្រែក្លាយទីក្រុង ដែលត្រូវបានគេស្គាល់សម្រាប់ជីវិតនៅពេលរាត្រីដ៏រស់រវើក ក្លាយទៅជាមជ្ឈមណ្ឌលនៃភាពភ័យខ្លាច និងជម្លោះ។

អំពើហិង្សាកាន់តែអាក្រក់ បន្ទាប់ពីក្រុមដែលស្មោះត្រង់នឹងលោក ជ័គីន អែលឆាប៉ូ ហ្គុម៉ាន់( Joaquin 'El Chapo' Guzman) បានផ្តាច់ទំនាក់ទំនងជាមួយ លោក Zambada ដោយធ្វើឱ្យតំបន់នេះមានអស្ថិរភាព និងបង្កបញ្ហាប្រឈមដល់រដ្ឋាភិបាលរបស់ប្រធានាធិបតី លោកស្រី ក្លៅឌៀ សេនបោម(Claudia Sheinbaum)។

ក្រុមបាតុករបានស្លៀកពាក់ពណ៌ស គ្រវីស្លាកនិងស្រែកថា «គ្រប់គ្រាន់ហើយ យើងចង់បានសន្តិភាព»។ បាតុករម្នាក់បានសម្តែងការព្រួយបារម្មណ៍របស់សហគមន៍បាននិយាយថា «យើងចង់បានស្ថិរភាពសម្រាប់មនុស្សគ្រប់គ្នា។ យើងទាំងអស់គ្នាត្រូវបានធ្វើឲ្យរាំងស្ទះ មានចាប់ជំរិត ហើយគិតថារាល់ថ្ងៃនឹងក្លាយជាថ្ងៃចុងក្រោយរបស់យើង»។