រដ្ឋមន្ត្រីការបរទេសអ៊ីរ៉ង់ បាននិយាយក្នុងអត្ថបទព័ត៌មានមួយរបស់កាសែត The Guardian នៅអាទិត្យ (ទី៧ ខែកញ្ញា) ថា ប្រទេសអ៊ីរ៉ង់ នឹងទទួលយកដែនកំណត់លើកម្មវិធីនុយក្លេអ៊ែររបស់ខ្លួន និងការរឹតបន្តឹងលើការចម្រាញ់សារធាតុអ៊ុយរ៉ានីញ៉ូម ប្រសិនបើទណ្ឌកម្មអន្តរជាតិទាំងឡាយត្រូវបានដកចេញ។

ប្រមុខការបរទេសអ៊ីរ៉ង់ លោក Abbas Araghchi បានលើកឡើងថា "អ៊ីរ៉ង់ត្រៀមខ្លួនជាស្រេចដើម្បីបង្កើតការចរចាជាក់ស្តែង និងយូរអង្វែង ដែលរួមបញ្ចូលការត្រួតពិនិត្យ និងទប់ស្កាត់ការចម្រាញ់អ៊ុយរ៉ានីញ៉ូម ជាថ្នូរនឹងការបញ្ចប់ទណ្ឌកម្ម"។ លោកបន្តថា "បរាជ័យក្នុងការចាប់យកឱកាសដ៏ខ្លីនេះ អាចមានផលវិបាកដ៏បំផ្លិចបំផ្លាញសម្រាប់តំបន់ និងលើសពីនេះទៅទៀត ក្នុងកម្រិតមិនធ្លាប់មានពីមុន"។

សារនេះត្រូវបានផ្ញើទៅកាន់មហាអំណាចអឺរ៉ុបទាំងបី E3 នៃប្រជាជាតិដូចជា បារាំង អាល្លឺម៉ង់ និងចក្រភពអង់គ្លេស ដែលពាក់ព័ន្ធនឹងការពិភាក្សាជាមួយអ៊ីរ៉ង់ ជុំវិញកម្មវិធីនុយក្លេអ៊ែររបស់ខ្លួន។ កាលពីចុងខែសីហា ប្រទេស E3 បានបង្កើតយន្តការមួយ ដើម្បីដាក់ទណ្ឌកម្មរបស់អង្គការសហប្រជាជាតិ ឡើងវិញលើអ៊ីរ៉ង់ ចំពោះការខកខានមិនបានអនុវត្តតាមការប្តេជ្ញាចិត្តលើកម្មវិធីនុយក្លេអ៊ែរ ដែលខ្លួនបានចុះហត្ថលេខាកាលពីមួយទសវត្សរ៍មុន។

នៅក្រោមយន្តការ "ត្រឡប់ទៅស្ថានភាពដើមវិញ" នោះ E3 បានទុកពេលឱ្យអ៊ីរ៉ង់មួយខែដើម្បីចរចា មុនពេលទណ្ឌកម្មត្រូវបានដាក់ឡើងវិញ។ បណ្តាប្រទេសលោកខាងលិចបានចោទអ៊ីរ៉ង់ ថាកំពុងស្វះស្វែងផលិតអាវុធនុយក្លេអ៊ែរ ជាអ្វីដែលទីក្រុងតេអេរ៉ង់ តែងបដិសេធជាប់រហូត ដោយទទូចថានោះជាកម្មវិធីនុយក្លេអ៊ែរស៊ីវិលប៉ុណ្ណោះ៕