ប្រព័ន្ធផ្សព្វផ្សាយថៃ បានរាយការណ៍ថា យន្តហោះឯកជនរបស់អតីតនាយករដ្ឋមន្រ្តីថៃ ដ៏ចម្រូងចម្រាស លោក ថាក់ស៊ីន ស៊ីណាវ៉ាត់ បានចុះចតនៅអាកាសយានដ្ឋានអន្តរជាតិ ដនមឿង ក្នុងទីក្រុងបាងកក នៅមុនវេលាម៉ោងក្នុងស្រុក ៣រសៀល នាថ្ងៃចន្ទ ទី៨ ខែកញ្ញា នេះ ក្រោយលោកបានចាកចេញពីប្រទេសថៃ កាលពីថ្ងៃទី៤ កញ្ញា យ៉ាងប្រញាប់ប្រញាល់ទៅពិនិត្យសុខភាពនៅសិង្ហបុរី ប៉ុន្តែបែរជាចុះចតដំបូងនៅទីក្រុងឌុយបៃ។

កាសែតថៃ បានចេញផ្សាយរូបថតរបស់លោក ថាក់ស៊ីន នៅព្រលានយន្តហោះដនមឿង ហើយរថយន្តរបស់លោកត្រូវគេប្រទះឃើញថាបានចាកចេញពីអាកាសយានដ្ឋានភ្លាមៗបន្ទាប់ពីម៉ោង ៣រសៀល ប៉ុន្តែពុំមានអ្នកកាសែតណាម្នាក់អាចបញ្ជាក់បានឡើយថារូបលោកពិតជាបានជិះនៅក្នុងរថយន្តនោះមែនឬយ៉ាងណា។

ស្របពេលមានការរំពឹងទុកយ៉ាងទូលំទូលាយថាលោកនិរទេសខ្លួនទៅនៅបរទេសជាថ្មី លោក ថាក់ស៊ីន បានប្ដេជ្ញាថាលោកនឹងវិលត្រឡប់ទៅប្រទេសវិញ ហើយចូលរួមសវនាការដោយផ្ទាល់នៅថ្ងៃអង្គារស្អែកនេះ។ ចំណែកកូនស្រីរបស់លោក គឺអតីតនាយករដ្ឋមន្រ្តីថៃ ផែថងថាន ស៊ីណាវ៉ាត់ ក៏បានអះអាងផងដែរនៅថ្ងៃចន្ទដដែលនេះថា ឪពុករបស់ខ្លួនពិតជានឹងវិលត្រឡប់ចូលប្រទេសវិញ។

ប្រសិនបើត្រូវបានបញ្ជាក់ ការវិលត្រឡប់មកវិញរបស់លោក ថាក់ស៊ីន កើតឡើងមួយថ្ងៃប៉ុណ្ណោះ នៅមុនពេលសាលក្រមដ៏សំខាន់មួយក្នុងសំណុំរឿង "ដេកពេទ្យវីអាយភីជាន់ទី១៤" អំឡុងពេលជាប់ពន្ធនាគារក្នុងឆ្នាំ២០២៤ របស់លោក ដោយតុលាការកំពូល នៅថ្ងៃអង្គារ ទី៩ ខែកញ្ញា ស្អែកនេះ ដែលអាចនឹងកំណត់ថាតើការស្នាក់នៅក្នុងមន្ទីរពេទ្យនោះគឺជាភាពចាំបាច់ផ្នែកវេជ្ជសាស្រ្តស្របច្បាប់ ឬជាការប៉ុនប៉ងដោយខុសច្បាប់ដើម្បីគេចវេសពីពន្ធនាគារ ដែលជាសេចក្តីសម្រេចដ៏ធំមួយអាចបញ្ជូនលោក ថាក់ស៊ីន ឱ្យត្រឡប់ទៅជាប់ពន្ធនាគារវិញ៕