ទីភ្នាក់ងារសិទ្ធិជ្រកកោនរបស់សហភាពអឺរ៉ុប (EU) នៅថ្ងៃចន្ទ (ទី៨ ខែកញ្ញា) នេះ បានប្រាប់ឲ្យដឹងថា ពាក្យសុំសិទ្ធិជ្រកកោន នៅសហភាពអឺរ៉ុប បានធ្លាក់ចុះ ២៣ភាគរយ ក្នុងរយៈពេល ៦ខែដំបូងនៃឆ្នាំ២០២៥ ដោយនេះត្រូវបានជំរុញដោយការធ្លាក់ចុះដ៏ធំនូវចំនួនប្រជាជនស៊ីរីដែលស្វែងរកការការពារ។

ទិន្នន័យពីទីភ្នាក់ងារសហភាពអឺរ៉ុប សម្រាប់ការសុំសិទ្ធិជ្រកកោន (EUAA) បានបង្ហាញថា ប្រជាជនស៊ីរីបានដាក់សំណើប្រហែល ២៥.០០០នាក់ នៅក្នុងប្លុកដែលមានសមាជិក ២៧ប្រទេស បូកនឹងស្វីស និងន័រវេស (EU+) ដោយធ្លាក់ចុះ ៦៦ភាគរយ ក្នុងរយៈពេលដូចគ្នាកាលពីឆ្នាំមុន។

EUAA បានឲ្យដឹងនៅក្នុងរបាយការណ៍មួយថា៖ «ការថយចុះដ៏គួរឲ្យកត់សម្គាល់នេះ គឺស្ទើរតែដោយសារតែការផ្លាស់ប្តូរគោលនយោបាយនៅក្នុង EU+ តែការទម្លាក់មេដឹកនាំដ៏យូរអង្វែងរបស់ស៊ីរី គឺលោក Bashar al-Assad ចេញពីអំណាច មានចំណែកធំជាង»។

របាយការណ៍បានបន្ថែមថា៖ «ដោយអាជ្ញាធរស៊ីរីថ្មីដែលតស៊ូ ដើម្បីស្ថិរភាព និងការកសាងឡើងវិញ ប្រជាជនស៊ីរីដែលបានភៀសខ្លួនជាច្រើន កាន់តែមានក្ដីសង្ឃឹមខ្លាំងឡើងៗ ក្នុងការបានវិលត្រលប់ទៅកសាងសហគមន៍របស់ពួកគេឡើងវិញ»។

ជនជាតិស៊ីរីដែលមានចំនួនអ្នកដាក់ពាក្យច្រើនជាងគេនោះ ឥឡូវនេះ គឺជាក្រុមធំទី៣ នៅពីក្រោយប្រជាជនវេណេហ្ស៊ុយអេឡា និងអាហ្វហ្កានីស្ថាន។ អាល្លឺម៉ង់បានវ៉ាដាច់បារាំង និងអេស្ប៉ាញ ក្នុងនាមជាប្រទេសទិសដៅនាំមុខគេ សម្រាប់អ្នកស្វែងរកសិទ្ធិជ្រកកោន។

ការថយចុះជារួមសនេះ នឹងត្រូវបានស្វាគមន៍នៅទីក្រុងប្រ៊ុចសែល ដោយសារសហភាពអឺរ៉ុប កំពុងស្ថិតក្រោមសម្ពាធឲ្យទប់ស្កាត់ជនអន្តោប្រវេសន៍ បន្ទាប់ពីមានការបញ្ចេញមតិសាធារណៈអវិជ្ជមាន ដែលបានជំរុញឲ្យមានការកើនឡើងនូវការបោះឆ្នោតគាំទ្រក្រុមស្ដាំនិយមជ្រុល នៅក្នុងរដ្ឋជាសមាជិកមួយចំនួន៕