វិមានក្រឹមឡាំង នៅថ្ងៃចន្ទ (ទី៨ ខែកញ្ញា) នេះ បានប្រាប់ឲ្យដឹងថា គ្មានទណ្ឌកម្មណាមួយ នឹងអាចបង្ខំឲ្យរុស្ស៊ីផ្លាស់ប្តូរទិសដៅលើអ៊ុយក្រែននោះឡើយ ដោយការលើកឡើងនេះកើតមានឡើងត្រឹមតែប៉ុន្មានម៉ោងប៉ុណ្ណោះបន្ទាប់ពីទាំងសហរដ្ឋអាមេរិក និងសហភាពអឺរ៉ុប (EU) បានបង្ហាញថា ការដាក់ទណ្ឌកម្មបន្ថែមកំពុងត្រូវបានពិចារណា ។

ប្រទេសលោកខាងលិចបានដាក់ទណ្ឌកម្មខុសគ្នារាប់ពាន់លើរុស្ស៊ី ជុំវិញសង្រ្គាមឆ្នាំ២០២២ នៅអ៊ុយក្រែន និងការបញ្ចូលឧបទ្វីបគ្រីម៉ាជាដែនដីឧបសម្ព័ន្ធ នៅឆ្នាំ២០១៤ ក្នុងគោលបំណងពន្លិចសេដ្ឋកិច្ចគិតជាទឹកប្រាក់ ២,២សែនកោដិលានដុល្លាររបស់រុស្ស៊ី និងធ្វើឲ្យប៉ះពាល់ការគាំទ្រ ចំពោះលោកប្រធានាធិបតី Vladimir Putin។

លោក Putin និយាយថា សេដ្ឋកិច្ចរុស្ស៊ីដែលមានកំណើនលឿនជាងក្រុមប្រទេសទាំង៧ (G7) និងផ្ទុយពីការព្យាកររបស់លោកខាងលិច ជុំវិញការធ្លាក់ចុះ បានបន្តភាពរឹងមាំយ៉ាងល្អប្រសើរ ហើយលោកបានណែនាំឲ្យក្រុមហ៊ុន និងមន្ត្រីប្រឆាំងទប់ទល់នឹងទណ្ឌកម្មតាមគ្រប់មធ្យោបាយដែលពួកគេអាចធ្វើបាន។

លោក Dmitry Peskov បានប្រាប់អ្នកសារព័ត៌មានរបស់វិមានក្រឹមឡាំង លោក Alexander Yunasev ថា៖ «គ្មានទណ្ឌកម្មណាមួយ នឹងអាចបង្ខំឲ្យសហព័ន្ធរុស្ស៊ីផ្លាស់ប្តូរជំហរជាប់លាប់ដែលប្រធានាធិបតីរបស់យើង បានលើកឡើងម្តងហើយម្តងទៀតនោះទេ»។

ប្រធានាធិបតីអាមេរិក លោក Donald Trump បាននិយាយកាលពីថ្ងៃអាទិត្យចុងសប្ដាហ៍កន្លងមកថា លោកបានត្រៀមខ្លួនរួចជាស្រេច ដើម្បីឈានទៅដំណាក់កាលទី២ នៃការដាក់ទណ្ឌកម្មលើរុស្ស៊ី ជាការផ្ដល់សញ្ញាកៀកបំផុតដែលលោកបានលើកឡើងថា លោកជិតឈានដល់ការបង្កើនការដាក់ទណ្ឌកម្មប្រឆាំងនឹងទីក្រុងមូស្គូ ឬអ្នកទិញប្រេងរបស់ប្រទេសនេះ ពាក់ព័ន្ធនឹងសង្រ្គាម នៅអ៊ុយក្រែន៕