ក្រុមអាជ្ញាធរកូឡុំប៊ី បានសង្រ្គោះទាហាន ២៧នាក់ ក្នុងចំណោមទាហាន ៧២នាក់ ដែលត្រូវបានឃុំខ្លួននៅតំបន់ភាគនិរតីប្រទេស ក្នុងតំបន់គ្រប់គ្រងដោយក្រុមឧទ្ទាម ហើយនិងជាតំបន់សំខាន់សម្រាប់ការផលិតកូកាអ៊ីន ។

នៅក្នុងសេចក្តីថ្លែងការណ៍កាលពីថ្ងៃអាទិត្យ យោធាជូនដំណឹងថា ទាហាន ៤៥នាក់ផ្សេងទៀត នៅតែគ្មានសេរីភាពរបស់ពួកគេ ក្រោមរបបទ័ពព្រៃ ។

សេចក្តីថ្លែងការណ៍បន្តថា កងទ័ពជាតិ រក្សាវត្តមាននៅតំបន់នោះ ចាត់វិធានការ ដើម្បីស្តាសណ្តាប់ធ្លាប់ និងធានាការវិលត្រឡប់មកវិញរបស់ទាហានត្រូវចាប់ពង្រាត់ ។

ឧបទ្ទេវហេតុនេះ បានកើតឡើងនៅតំបន់ជ្រោះ Micay ស្ថិតក្នុងតំបន់ Cauca ជាទីតាំងផលិតកូកាអ៊ីន និងជាកន្លែងឈរជើងរបស់ក្រុមឧទ្ទាមនៃអតីតកងកម្លាំងបដិវត្តន៍កូឡុំប៊ី(FARC) ដែលតែងតែបើកការវាយប្រហារលើទីតាំងឈរជើងរបស់យោធា ។

យោងតាមការអះអាងរបស់កងទ័ពកូឡុំប៊ី បានឲ្យដឹងថា ទាហានបានចូលរួមប្រតិបត្តិការយោធា ពេលដែលមនុស្សប្រហែល ៦០០នាក់ រារាំងការដាក់ពង្រាយទាហាននៅតំបន់ San Juan de Micay ។

កងទ័ពបន្តថា ការរាំងបែបនោះ មានបំណងសម្របសម្រួលការគ្រប់គ្រងផ្លូវដែលត្រូវបានប្រើប្រាស់សម្រាប់ការជួយដូរគ្រឿងញៀន និងការជីករ៉ែខុសច្បាប់ ៕