អារ៉ាប៊ីសាអូឌីត បានប្រកាសគម្រោងថ្មី ដើម្បីជួយបោសសម្អាតគំនរបាក់បែក និងធ្វើការកសាងឡើងវិញរដ្ឋធានីដាម៉ាស របស់ប្រទេសស៊ីរី ក៏ដូចជាពង្រឹងទំនាក់ទំនងរាជាណាចក្រមួយនេះ ជាមួយអាជ្ញាធរថ្មីនៅក្នុងប្រទេសស៊ីរី ។

ក្រុមសប្បរសធម៌ KSRelief គាំទ្រដោយរដ្ឋ បាននិយាយកាលពីថ្ងៃអាទិត្យថា ពួកគេនឹងផ្តល់កញ្ចប់ជំនួយដែលនឹងជួយបោសសម្អាតគំនរបាក់បែកទំហំប្រហែល ៧៥.០០០ម៉ែត្រគូប ចេញពីរដ្ឋធានីដាម៉ាស និងតំបន់ជុំវិញទីក្រុង ។

លោក Abdullah Al Rabeeah ដែលដឹកនាំក្រុមសប្បុរសធម៌ KSReliefនិយាយក្នុងព្រឹត្តការណ៍នៅទីក្រុងដាម៉ាសថា ក្រុមសប្បរសធម៌របស់លោកមានកិត្តិយសក្នុងការសម្ពោធគម្រោងមនុស្សធម៌មួយចំនួនសម្រាប់ប្រជាពលរដ្ឋស៊ីរី រួមទាំងគម្រោងផ្តោតសំខាន់លើសុខភាព សន្តិសុខស្បៀង និងការអប់រំ ។

ជំនួយនេះនឹងជួយផងដែរ ការសាងសង់សាលារៀន ៣៤កន្លែងនៅទីក្រុង Aleppo, Idlib និងទីក្រុង Homs ការសាងសង់ឡើងវិញហាងដុតនំរាប់សិបកន្លែង ការស្តារឡើងវិញប្រព័ន្ធលូទឹកស្អុយ ហើយនិងហេដ្ឋារចនាសម្ព័ន្ធទឹកស្អាតនៅក្នុងទីក្រុងដាម៉ាស ។

នៅក្នុងសារបង្ហោះនៅលើបណ្តាញព័ត៌មានសង្គម X រដ្ឋមន្រ្តីគ្រប់គ្រងគ្រោះមហន្តរាយស៊ីរីលោក Raed al-Saleh និយាយថា កិច្ចព្រមព្រៀងដែលត្រូវបានចុះហត្ថលេខារវាងប្រទេសទាំង ២ នឹងជំរុញកិច្ចខិតខំឆ្លើយតបមនុស្សធម៌ និងការកសាងឡើងវិញនៅក្នុងប្រទេសស៊ីរី បញ្ជាក់ពីកម្លាំងមនុស្សធម៌ និងទំនាក់ទំនងជាបងប្អូនរវាងប្រទេសរបស់ពួកយើងទាំង ២ ។

សូមបញ្ជាក់ថា អារ៉ាប៊ីសាអូឌីត កាតា និងប្រទេសដទៃទៀតនៅតំបន់ឈូងសមុទ្រ បាននឹងកំពុងផ្តល់ការគាំទ្រផ្នែកសេដ្ឋកិច្ចដល់ប្រទេសស៊ីរី ចាប់តាំងពីការដួលរលំទៅរដ្ឋាភិបាលរបស់លោកអតីតប្រធានាធិបតី Bashar al-Assadកាលពីចុងឆ្នាំ ២០២៤ ក្រោយសង្រ្គាមស៊ីវិលអស់រយៈពេល ១៣ឆ្នាំ ៕