មេដឹកនាំកូរ៉េខាងជើងលោក Kim Jong Un បានត្រួតពិនិត្យ ការសាកល្បងបាញ់ម៉ូទ័រដំណើរការដោយឥន្ធនៈរឹងដ៏ទំនើប ដែលប្រើក្នុងការបាញ់មីស៊ីលររយៈចម្ងាយឆ្ងាយបំពាក់ដោយនុយក្លេអ៊ែរ នេះបើយោងតាមប្រព័ន្ធផ្សព្វផ្សាយរដ្ឋនៅថ្ងៃអង្គារនេះ មួយសប្តាហ៍បន្ទាប់ពីបានត្រួតពិនិត្យការអភិវឌ្ឍន៍របស់ម៉ូទ័រ មុនពេលធ្វើដំណើរទៅកាន់ប្រទេសចិន។  

លោក Kim Jong Un និយាយថា ការអភិវឌ្ឍន៍ម៉ាស៊ីនប្រភេទនេះ នាំទៅរកការផ្លាស់ប្ដូរដ៏សំខាន់ចំពោះកងកម្លាំងនុយក្លេអ៊ែរ។ 

ក្រុងព្យុងយ៉ាងបានហៅព្រឹត្តិការណ៍នេះ ថាជាការសាកល្បងលើកទីប្រាំបួន និងចុងក្រោយនៃដំណើរការអភិវឌ្ឍរបស់ម៉ាស៊ីន ដោយលើកឡើងថានឹងមានការបាញ់សាកល្បងមីស៊ីលអន្តរទ្វីប (ICBM) ដោយប្រើម៉ាស៊ីននេះ ក្នុងពេលឆាប់ៗ។

សារព័ត៌មាន Rodong Sinmun បានរាយការណ៍ថា ម៉ូទ័រនេះប្រើប្រាស់ "សម្ភារៈសមាសធាតុកាបូនហ្វៃប៊" ដែលទើបនឹងបង្កើតថ្មី ហើយការសាកសល្បងកាលពីថ្ងៃចន្ទ ក្លាយជាសមិទ្ធផលដ៏សំខាន់បំផុតជាយុទ្ធសាស្ត្រនៅក្នុងការងារទំនើបកម្មបច្ចេកវិទ្យាការពារជាតិ ដែលកូរ៉េខាងជើងបានធ្វើនាពេលថ្មីៗនេះ ។

សារព័ត៌មានក្នុងស្រុកកូរ៉េខាងជើង Rodong Sinmun ដដែលនេះ បាននិយាយថា ការធ្វើតេស្តនេះត្រូវបានធ្វើឡើងដោយរដ្ឋបាលមីស៊ីល ខណៈរូបថតបង្ហាញថា បានធ្វើឡើងនៅទីតាំងសាកល្បងបាញ់បង្ហោះផ្កាយរណប Sohae នៅឆ្នេរសមុទ្រភាគពាយព្យ ជិតព្រំដែនជាមួយប្រទេសចិន៕