ក្រុមមន្ត្រីជាន់ខ្ពស់ទទួលបន្ទុកផ្នែកដាក់ទណ្ឌកម្មរបស់សហភាពអឺរ៉ុប បានទៅកាន់ទីក្រុងវ៉ាស៊ីនតោន ជាមួយក្រុមអ្នកជំនាញ កាលពីថ្ងៃចន្ទ (៨ កញ្ញា) ដើម្បីពិភាក្សាពីអ្វីដែលនឹងក្លាជាវិធានការទណ្ឌកម្មឆ្លងមហាសមុទ្រអាត្លង់ទិក ដែលសម្របសម្រួលជាលើកដំបូងបំផុតចាប់តាំងពីលោកប្រធានាធិបតី Donald Trump ត្រលប់ចូលកាន់តំណែង ប្រឆាំងនឹងរុស្ស៊ី។

ដោយទីក្រុងមូស្គូ នៅតែបន្តវាយលុកទីក្រុងនានារបស់អ៊ុយក្រែន ច្រើនជាង ៣សប្តាហ៍បន្ទាប់ពីលោក Trump បានជួបជាមួយប្រធានាធិបតីរុស្ស៊ី លោក Vladimir Putin ក្នុងកិច្ចប្រជុំកំពូលនៅអាឡាស្កា បណ្ដាមេដឹកនាំអឺរ៉ុបសង្ឃឹមថា នៅទីបំផុត ប្រធានាធិបតីអាមេរិករូបនេះបានត្រៀមខ្លួនរួចរាល់ដើម្បីអនុវត្តតាមការគំរាមកំហែងដាក់ទណ្ឌកម្មលើរុស្ស៊ី ម្តងហើយម្តងទៀតរបស់លោក។

កាលពីថ្ងៃអាទិត្យចុងសប្ដាហ៍ បន្ទាប់ពីការវាយប្រហារតាមផ្លូវអាកាសដ៏ធំបំផុតក្នុងសង្រ្គាមរហូតមកដល់ពេលនេះបានបំផ្លាញអគាររដ្ឋាភិបាលទីក្រុងគីវ លោក Trump និយាយថា លោកត្រៀមរួចហើយដើម្បីឆ្ពោះទៅរកការរឹតបន្តឹងដំណាក់កាលទីពីរ ប៉ុន្តែលោកមិនទាន់ប្រកាសទណ្ឌកម្មថ្មីផ្លូវការនៅឡើយទេ។

ប្លុកអឺរ៉ុបផ្តល់សេចក្ដីលម្អិតតិចតួចណាស់ពីបេសកកម្មរបស់ប្រេសិតទណ្ឌកម្មរបស់ខ្លួន គឺលោក David O'Sullivan ប្រចាំនៅអាមេរិកនោះ ប៉ុន្តែប្រសិនបើលោកទទួលបានជោគជ័យក្នុងការសម្របសម្រួលកញ្ចប់មួយជាមួយភាគីអាមេរិបាន នោះនឹងក្លាយជាទណ្ឌកម្មទីមួយហើយដែលកើតឡើង ចាប់តាំងពីលោក Trump ត្រឡប់មកកាន់តំណែងវិញនៅខែមករា ឆ្នាំ២០២៥នេះ។ ក្រុមមន្ត្រីប្លុកអឺរ៉ុបសង្ឃឹមថា នឹងមានកិច្ចសហប្រតិបត្តិការកាន់តែប្រសើរឡើង បន្ទាប់ពីការខកចិត្តជាច្រើនដងនៅដើមឆ្នាំនេះ ខណៈលោក Trump បានបន្តធ្វើកិច្ចចរចាសន្តិភាពផ្ទាល់ខ្លួនជាមួយលោក Putin។

អ្នកនាំពាក្យវិមានក្រឹមឡាំង លោក Dmitry Peskov ហាក់ច្រានចោលការគំរាមកំហែងនេះ ដោយនិយាយថា "ពុំមានទណ្ឌកម្មណាអាចបង្ខំឱ្យរុស្ស៊ី ប្តូរជំហរជាប់លាប់របស់ខ្លួនបានឡើយ"៕