វិមានក្រឹមឡាំងបាននិយាយកាលពីថ្ងៃចន្ទដើមសប្ដាហ៍នេះថា នឹងពុំមានទណ្ឌកម្មណាមួយបង្ខំឲ្យរុស្ស៊ីកែប្រែបំណងរបស់ខ្លួនក្នុងសង្គ្រាមអ៊ុយក្រែនឡើយ ប៉ុន្មានម៉ោងបន្ទាប់ពីសហរដ្ឋអាមេរិក និងសហភាពអឺរ៉ុប បានបង្ហើបថា ពួកគេកំពុងពិចារណាបន្ថែមការរឹតត្បិតលើសេដ្ឋកិច្ចរបស់រុស្ស៊ី។

រុស្ស៊ីបានច្រានចោលការអត្ថាធិប្បាយចុងក្រោយរបស់ប្រធានាធិបតីអាមេរិកលោក Donald Trump អំពីការដាក់ទណ្ឌកម្មបន្ថែមលើខ្លួនជុំវិញសង្គ្រាមនៅអ៊ុយក្រែន ដោយនិយាយថា ទណ្ឌកម្មទាំងនោះពុំមានឥទ្ធិពលអ្វីទាំងអស់ និងគ្មានប្រយោជន៍ទាល់តែសោះ។ 

លោក Trump បានប្រាប់អ្នកយកព័ត៌មានកាលពីថ្ងៃអាទិត្យទី ៧ ខែកញ្ញាថាលោកបានត្រៀមខ្លួនជាស្រេចដើម្បីឈានទៅដំណាក់កាលបន្ទាប់នៃទណ្ឌកម្មប្រឆាំងនឹងរុស្ស៊ី។ លោកបានគំរាមយកពន្ធបន្ទាប់បន្សំលើដៃគូពាណិជ្ជកម្មធំៗរបស់រុស្ស៊ី និងទណ្ឌកម្មផ្សេងទៀត ប្រសិនបើក្រុងមូស្គូមិនបង្កើតសន្តិភាពជាមួយអ៊ុយក្រែនឆាប់ៗ។   

ចាប់តាំងពីពេលនោះមក សង្រ្គាមបានបន្ត ហើយកាលពីចុងសប្តាហ៍ទីក្រុងមូស្គូបានបើកការវាយប្រហារតាមអាកាសដ៏ធំបំផុតរបស់ខ្លួនរហូតមកដល់បច្ចុប្បន្ន។ អគាររដ្ឋាភិបាលអ៊ុយក្រែនសម្រាប់គណៈរដ្ឋមន្ត្រី ត្រូវបានប៉ះចំជាលើកដំបូងក្នុងអំឡុងពេលការវាយប្រហារ។  

លោក Dmitry Peskov អ្នកនាំពាក្យរបស់ប្រធានាធិបតីរុស្ស៊ី លោក Vladimir Putin បានស្តីបន្ទោសទីក្រុង Kyiv និងសម្ព័ន្ធមិត្តអឺរ៉ុបរបស់អ៊ុយក្រែន ចំពោះការបន្តដាក់ទណ្ឌកម្មបន្ថែមទៀតនៃរបៀបវារៈសម្រាប់ទីក្រុងវ៉ាស៊ីនតោន៕