សភាបារាំង បានទម្លាក់រដ្ឋាភិបាលរបស់លោកនាយករដ្ឋមន្ត្រី Francois Bayrou កាលពីថ្ងៃចន្ទ (៨ កញ្ញា) ក្នុងការបោះឆ្នោតដកសេចក្ដីទុកចិត្តមួយ ជុំវិញផែនការរបស់លោកក្នុងការដោះស្រាយបំណុលជាតិ ដែលកំពុងរីករាលដាល ដោយធ្វើឱ្យវិបត្តិនយោបាយដែលកំពុងលេបត្របាក់សេដ្ឋកិច្ចធំទីពីររបស់តំបន់ចាយប្រាក់អឺរ៉ូមួយនេះកាន់តែស៊ីជម្រៅឡើង។

សមាជិកសភាបារាំង បានបោះឆ្នោតទម្លាក់លោកនាយករដ្ឋមន្ត្រី Bayrou និងរដ្ឋាភិបាលសំឡេងភាគតិចរបស់លោក ជាមួយនឹងសំឡេងប្រឆាំង៣៦៤ ទល់ការគាំទ្រត្រឹមតែ ១៩៤សំឡេងប៉ុណ្ណោះ លើអ្នកនយោបាយជើងចាស់កណ្តាលនិយមរូបនេះ។ ការិយាល័យនាយករដ្ឋមន្ត្រីបារាំង និយាយថា លោក Bayrou នឹងដាក់លិខិតលាលែងពីតំណែងរបស់លោកនៅថ្ងៃអង្គារនេះ។

លោកប្រធានាធិបតី Emmanuel Macron ដែលកំពុងប្រឈមការអំពាវនាវពីបក្សប្រឆាំងឱ្យរំលាយសភា និងលាលែងពីតំណែង នឹងស្វះស្វែងរកនាយករដ្ឋមន្ត្រីទី៥ របស់ខ្លួនក្នុងពេលតិចជាងពីរឆ្នាំ ហើយការិយាល័យលោក និយាយថា លោក Macron នឹងតែងតាំងនាយករដ្ឋមន្ត្រីថ្មីក្នុងប៉ុន្មានថ្ងៃខាងមុខ។

កិច្ចការដ៏តឹងតែងបំផុតរបស់រដ្ឋាភិបាលបន្ទាប់ គឺជាការអនុម័តកញ្ចប់ថវិកាជាតិ ដែលជាបញ្ហាប្រឈមដ៏ចម្រូងចម្រាសដូចដែលលោក Francois Bayrou បានជួបប្រទះ នៅពេលលោកទើបចូលកាន់តំណែងកាលពី ៩ខែមុន។ ការធានាឱ្យមានការគាំទ្រពីសភាបារាំង ដែលបែកបាក់គ្នាយ៉ាងខ្លាំងនេះ ក៏នឹងមានកម្រិតពិបាកយ៉ាងខ្លាំងផងដែរ។

លោក Bayrou ផ្ទាល់គឺជាអ្នកអំពាវនាវឱ្យមានការបោះឆ្នោតសេចក្ដីទុកចិត្តនេះដើម្បីព្យាយាមយកឈ្នះការគាំទ្រពីសភា សម្រាប់យុទ្ធសាស្ត្ររបស់លោកក្នុងការកាត់បន្ថយឱនភាពជាតិ ប៉ុន្តែក្រុមបក្សប្រឆាំងមិនបានគាំទ្រកញ្ចប់ថវិការបស់លោកទេ ដែលអាចនឹងមើលឃើញការសន្សំប្រាក់ចំនួន ៤៤ ពាន់លានអឺរ៉ូ (៥១,៥១ ពាន់លានដុល្លារអាមេរិក) ក្នុងថវិកាជាតិឆ្នាំក្រោយ៕