តុលាការកំពូលប្រទេសថៃ នៅថ្ងៃអង្គារ ទី៩ ខែកញ្ញា នេះ បានសម្រេចកាត់ក្តីឱ្យអតីតនាយករដ្ឋមន្រ្តីថៃ លោក ថាក់ស៊ីន ស៊ីណាវ៉ាត់ ត្រូវតែជាប់ពន្ធនាគាររយៈពេល ១ឆ្នាំ ដោយសារការសម្រាកព្យាបាលរបស់លោកនៅក្នុងមន្ទីរពេទ្យបន្ទប់វីអាយភី ជំនួសឱ្យការជាប់ពន្ធនាគារ គឺជារឿងខុសច្បាប់។

អ្នកយកព័ត៌មានរ៉យទ័រដែលបានចូលរួមក្នុងការសម្រេចសាលក្រមនោះ បាននិយាយថាតុលាការនឹងចាប់លោក ថាក់ស៊ីន ទៅឃុំឃាំង។ ចៅក្រមទាំង ៥រូប បាននិយាយថា ភាពទទួលខុសត្រូវចំពោះការស្នាក់នៅមន្ទីរពេទ្យរយៈពេលវែងរបស់លោក ថាក់ស៊ីន មិនស្ថិតនៅលើក្រុមគ្រូពេទ្យនោះទេ ហើយថា មហាសេដ្ឋីរូបនេះមានចេតនាពន្យារការស្នាក់នៅក្នុងមន្ទីរពេទ្យ ជំនួសឱ្យការជាប់ពន្ធនាគារ។

ក្រោយត្រលប់មកវិញពីការនិរទេសខ្លួនឯងរយៈពេល ១៥ឆ្នាំក្នុងឆ្នាំ២០២៣ លោក ថាក់ស៊ីន វ័យ ៧៦ឆ្នាំ បានចំណាយពេលតែប៉ុន្មានម៉ោងប៉ុណ្ណោះនៅក្នុងពន្ធនាគារ មុនពេលត្រូវបញ្ជូនទៅមន្ទីរពេទ្យ ដោយត្អូញត្អែរពីបញ្ហាបេះដូង និងឈឺទ្រូង ដែលបង្កឱ្យមានការសង្ស័យ និងការផ្ទុះកំហឹងជាសាធារណៈ។

ការកាត់ទោសរយៈពេល ៨ឆ្នាំ របស់លោកពីបទទំនាស់ផលប្រយោជន៍ និងការរំលោភអំណាច ត្រូវបានបន្ធូរបន្ថយមកត្រឹមរយៈពេល ១ឆ្នាំប៉ុណ្ណោះដោយព្រះមហាក្សត្រ ហើយលោក ថាក់ស៊ីន ត្រូវដោះលែងឱ្យនៅក្រៅឃុំ បន្ទាប់ពីរយៈពេល ៦ខែ --អំឡុងខែកុម្ភៈ ឆ្នាំ២០២៤-- ដែលពេលវេលាទាំងអស់នោះ លោកបានចំណាយទាំងស្រុងនៅក្នុងបន្ទប់វីអាយភីនៃមន្ទីរពេទ្យមួយ ក្រោមលេសបញ្ហាសុខភាព៕