អតីតនាយករដ្ឋមន្រ្តីថៃ ដ៏ចម្រូងចម្រាស លោក ថាក់ស៊ីន ស៊ីណាវ៉ាត់ បានចេញសេចក្តីថ្លែងការណ៍មួយនៅលើបណ្តាញសង្គមក្នុងថ្ងៃអង្គារ (៩ កញ្ញា) នេះ ដោយនិយាយថា លោកយល់ព្រមទទួលយកសេចក្ដីសម្រេចរបស់តុលាការកំពូល នៃការជាប់ពន្ធនាគាររយៈពេល ១ឆ្នាំឡើងវិញ ជុំវិញសំណុំរឿង “ដេកពេទ្យវីអាយភីជាន់ទី១៤” របស់លោក ដោយបន្ថែមថា លោកនឹងបន្តស្មារតីរឹងមាំទាំងផ្លូវកាយ និងផ្លូវចិត្ត។

លោកបាននិយាយទៀតថា លោកទន្ទឹងរង់ចាំការដោះស្រាយព្រឹត្តិការណ៍នាពេលកន្លងមក រួមទាំងការតស៊ូផ្លូវច្បាប់ និងជម្លោះដទៃផ្សេងទៀតដែលលោកបានជាប់ពាក់ព័ន្ធ។

នៅក្នុងសារបង្ហោះលើបណ្ដាញសង្គម X នោះ លោក ថាក់ស៊ីន បានសរសេរថា៖ "ចាប់ពីថ្ងៃនេះទៅ ទោះលោកមិនមានសេរីភាពផ្លូវកាយក៏ដោយ ក៏លោកនៅតែមានសេរីភាពក្នុងការគិត ដើម្បីផលប្រយោជន៍ជាតិ និងប្រជាជន" ហើយបញ្ចប់សារដោយសរសេរថា “លោកនឹងចំណាយពេលវេលារបស់លោកដើម្បីបម្រើអង្គព្រះមហាក្សត្រ ប្រទេសជាតិ និងប្រជាជនថៃ”។

បន្ទាប់ពីតុលាការកំពូលចេញសាលក្រម ក្រុមសារព័ត៌មានរ៉យទ័របាននិយាយថា លោក ថាក់ស៊ីន ទំនងជាត្រូវបានចាប់ខ្លួន ហើយបញ្ជូនទៅដល់ពន្ធនាគាររួចទៅហើយ ដោយអ្នកកាសែតមើលឃើញ ក្បួនរថយន្តក្រុងខ្នាតតូចពណ៌ស ៣គ្រឿង បានទៅដល់បរិវេណពន្ធនាគារ ហើយជិះចូលទៅក្នុងនោះ តាមពីក្រោយដោយរថយន្តពណ៌ខ្មៅ ១គ្រឿង។ ក្បួនរថយន្តនេះត្រូវបានគេជឿថាដឹកលោក ថាក់ស៊ីន បើទោះជាគេមើលមិនឃើញថាមានអ្នកណានៅខាងក្នុងនោះក៏ដោយ៕