កងកម្លាំងសន្តិសុខ បានបើកការបាញ់ប្រហារទៅលើក្រុមអ្នកតវ៉ាក្នុងទីក្រុង Uvira ភាគខាងកើតប្រទេសកុងហ្គោ កាលពីថ្ងៃចន្ទ ទី៨ ខែកញ្ញា ដោយសាក្សីបានរាយការណ៍ថាមានអ្នកស្លាប់និងរងរបួសច្រើននាក់។ ការតវ៉ាមួយ ត្រូវបានធ្វើឡើងដើម្បីប្រឆាំងនឹងការតែងតាំងឧត្តមសេនីយ លោក Olivier Gasita នាពេលថ្មីៗនេះ ជាមេបញ្ជាការរងនៃកងកម្លាំងយោធាក្នុងតំបន់។ ក្រុមបាតុករ បានចោទប្រកាន់ លោក Gasita ថាមានទំនាក់ទំនងជាមួយក្រុមឧទ្ទាម M23 ដែលគាំទ្រដោយប្រទេសរ្វ៉ានដា ហើយទាមទារឱ្យដកលោកចេញពីតំណែង។

មនុស្សរាប់រយនាក់ បានចេញធ្វើបាតុកម្មនៅតាមដងផ្លូវដោយមានកាន់បដា និងស្រែកពាក្យស្លោកប្រឆាំងនឹងការតែងតាំងឧត្តមសេនីយ៍រូបនេះ។ អភិបាលខេត្ត South Kivu បានបញ្ជាក់ថា «ក្រុមបាតុករគ្មានអាវុធ» ត្រូវបានរងការបាញ់ប្រហារដោយកាំភ្លើង ប៉ុន្តែមិនបានបញ្ជាក់ថាអ្នកណាជាអ្នកបើកការបាញ់ប្រហារ ឬផ្តល់តួលេខអ្នកស្លាប់និងរងរបួសពិតប្រាកដនោះទេ។ ក្រុមសង្គមស៊ីវិលក្នុងស្រុកបានអះអាងថាមានអ្នកស្លាប់ និងរបួសជាច្រើននាក់។

ទីក្រុង Uvira ដែលមានទីតាំងនៅខេត្ត South Kivu បច្ចុប្បន្នត្រូវបានគ្រប់គ្រងដោយក្រុមចម្រុះនៃកងកម្លាំងប្រដាប់អាវុធកុងហ្គោ (FARDC) និងកងជីវពលក្នុងស្រុក។ ទីក្រុងនេះ បានក្លាយជាតំបន់ដែលប្រជែងខ្លាំងនៅក្នុងជម្លោះដែលកំពុងបន្តរវាងកងកម្លាំងរដ្ឋាភិបាលនិងក្រុមឧទ្ទាមM23 គាំទ្រដោយប្រទេសរ៉្វាន់ដា។ ឧត្តមសេនីយ Gasita បានបដិសេធការចោទប្រកាន់ថាបានគាំទ្រក្រុមឧទ្ទាម M23 និងបានអំពាវនាវឱ្យមានសាមគ្គីភាពក្នុងចំណោមពលរដ្ឋកុងហ្គោ។