មនុស្សរាប់ពាន់នាក់បានមកប្រមូលផ្តុំគ្នានៅក្នុងទីក្រុង Belgrade កាលពីថ្ងៃចន្ទ ដោយតវ៉ាប្រឆាំងការប្រើប្រាស់កម្លាំងរបស់នគរបាលដើម្បីបង្ក្រាបបាតុកម្មមួយកាលពីសប្តាហ៍មុន និងបានទាមទារឱ្យមានការស៊ើបអង្កេតលើមន្រ្តីនគរបាលដែលតាមការសន្មត់ថាស្មោះត្រង់នឹងប្រធានាធិបតី លោក Aleksandar Vucic និងគណបក្សស៊ែប៊ីជឿនលឿន(SNS) ដែលកំពុងកាន់អំណាចរបស់លោក។ 

ក្រុមបាតុករបានដង្ហែរកាត់តាមកណ្តាលទីក្រុង Belgrade និងឆ្លងកាត់ស្ពានធំមួយឆ្លងទន្លេ Sava ដោយឈប់ចតនៅវិមានយុត្តិធម៌ ជាកន្លែងដែលពួកគេបានលាបថ្នាំពណ៌ក្រហមនៅមុខអគារតុលាការ និងទីស្នាក់ការនគរបាល។ ការប្រមូលផ្តុំគ្នានេះ ធ្វើឡើងបន្ទាប់ពីការតវ៉ានៅទីក្រុង Novi Sad ភាគខាងជើងកាលពីថ្ងៃសុក្រ ទី៥ ខែកញ្ញា ដែលនៅពេលនោះនគរបាលបានប្រើឧស្ម័នបង្ហៀរទឹកភ្នែកនិងគ្រាប់បែកផ្សែងដើម្បីបំបែកហ្វូងមនុស្ស។ 

ក្រុមអ្នកតវ៉ាបានចោទប្រកាន់នគរបាលថាបានប្រើប្រាស់កម្លាំងហួសហេតុនៅក្នុងទីក្រុង Novi Sad កាលពីថ្ងៃសុក្រសប្តាហ៍មុននិងក្នុងអំឡុងពេលនៃការតវ៉ាមុននេះ ដែលបានបណ្តាលឲ្យមនុស្សរាប់សិបនាក់រងរបួស និងត្រូវបានឃុំខ្លួន។ នគរបាលនិយាយថា ពួកគេកំពុងស៊ើបអង្កេតផ្ទៃក្នុងនៃការចោទប្រកាន់នេះ។ 

លោក Vucic និងគណបក្សស៊ែប៊ីជឿនលឿន(SNS) បានរង្គោះរង្គើដោយការតវ៉ានៅទូទាំងប្រទេសរយៈពេល១០ខែមកនេះ និងការបិទផ្លូវសាកលវិទ្យាល័យដែលបានចាប់ផ្តើមបន្ទាប់ពីមនុស្ស១៦នាក់បានស្លាប់នៅពេលដែលដំបូលនៅស្ថានីយ៍រថភ្លើងក្នុងទីក្រុង Novi Sad បានបាក់រលំកាលពីខែវិច្ឆិកា ឆ្នាំមុន។ និស្សិត គណបក្សប្រឆាំង និងអ្នកឃ្លាំមើលសិទ្ធិមនុស្ស បានដាក់កំហុសលើអំពើពុករលួយចំពោះមហន្តរាយនេះ ហើយកំពុងទាមទារឱ្យមានការបោះឆ្នោតមុនពេលកំណត់ ក្នុងក្តីសង្ឃឹមបណ្តេញលោក Vucic ចេញពីតំណែង និងគណបក្សរបស់លោកផងដែរ។