ប្រធានាធិបតីប្រទេសឥណ្ឌូនេស៊ី លោក Prabowo Subianto បានដាក់ជំនួសតំណែងរដ្ឋមន្ត្រីចំនួន៥រូបក្នុងការរុះរើគណៈរដ្ឋមន្ត្រីលឿនដូចផ្លេកបន្ទោលបន្ទាប់ពីការតវ៉ាដ៏ខ្លាំងក្លាដែលបានធ្វើឲ្យរង្គោះរង្គើប្រទេសនៅអាស៊ីអាគ្នេយ៍ដែលមានប្រជាជនចំនួន២៨៥លាននាក់ក្នុងរយៈពេលប៉ុន្មានសប្តាហ៍ថ្មីៗនេះ។

ភាពរង្គោះរង្គើក្នុងគណៈរដ្ឋមន្ត្រីកាលពីថ្ងៃចន្ទ កើតឡើងបន្ទាប់ពីការកើនឡើងការមិនពេញចិត្តជាសាធារណៈចំពោះរដ្ឋបាលរបស់លោក Prabowo និងភាពអសកម្មរបស់សភាជុំវិញការលំបាកផ្នែកសេដ្ឋកិច្ច ធ្វើឲ្យប៉ះពាល់ដល់ប្រជាជនជារៀងរាល់ថ្ងៃ ដែលនាំឱ្យមានការតវ៉ាទ្រង់ទ្រាយធំផ្ទុះឡើងកាលពីចុងខែសីហា។

រដ្ឋមន្ត្រីចំនួនប្រាំរូប បានបាត់បង់តំណែង រួមមានរដ្ឋមន្ត្រីក្រសួងហិរញ្ញវត្ថុ លោកស្រី Sri Mulyani Indrawati ដែលកាលពីពេលមុនធ្លាប់ជានាយកប្រតិបត្តិនៃមូលនិធិរូបិយវត្ថុអន្តរជាតិ (IMF) និងជានាយកគ្រប់គ្រងធនាគារពិភពលោក និងលោក Budi Gunawan ដែលជារដ្ឋមន្ត្រីសម្របសម្រួលផ្នែកនយោបាយ និងសន្តិសុខ។ស

លោក Prabowo បានជ្រើសរើសសេដ្ឋវិទូ លោក Purbaya Yudhi Sadewa ដែលជាប្រធានសាជីវកម្មធានារ៉ាប់រងលើប្រាក់បញ្ញើ ដើម្បីជំនួសលោកស្រី Indrawati ជារដ្ឋមន្ត្រីក្រសួងហិរញ្ញវត្ថុដែលកាន់តំណែងយូរបំផុតរបស់ប្រទេសឥណ្ឌូនេស៊ី។ លោក Prabowo ក៏បានដករដ្ឋមន្ត្រីក្រសួងសហប្រតិបត្តិការ យុវជន និងកីឡា និងរដ្ឋមន្ត្រីការពារពលករអន្តោប្រវេសន៍ផងដែរ។

ការតវ៉ាដោយហិង្សាបានរួមរឹតប្រទេសនេះកាលពីខែមុន បន្ទាប់ពីមានសេចក្តីរាយការណ៍ថាសមាជិកសភាទាំង៥៨០រូបបានទទួលប្រាក់ឧបត្ថម្ភសម្រាប់ការស្នាក់នៅប្រចាំខែចំនួន៥០លានរូពី (៣.០៧៥ ដុល្លារ) បន្ថែមលើប្រាក់ខែរបស់ពួកគេ។