ភ្នំពេញ៖ រដ្ឋសភានៃកម្ពុជា ចេញសេចក្តីថ្លែងការណ៍បដិសេធ និងច្រានចោលការចោទប្រកាន់ដោយអសីលធម៌របស់សមាជិកសភាអាស៊ានដើម្បីសិទ្ធិមនុស្ស (APHR) ដោយសារការចោទប្រកាន់នោះគ្មានមូលដ្ឋាន និងងងឹតងងល់។
បើតាមសេចក្តីថ្លែងការណ៍របស់រដ្ឋសភានៃព្រះរាជាណាចក្រកម្ពុជា នៅថ្ងៃទី២៥ ខែមករា ឆ្នាំ២០២២ តាមរយៈគណៈកម្មការកិច្ចការបរទេស សហប្រតិបត្តិការអន្តរជាតិនៃរដ្ឋសភា បានធ្វើការច្រានចោលយ៉ាងខ្លាំងក្លាចំពោះការចោទប្រកាន់ដោយគ្មានមូលដ្ឋាន និងងងឹតងងល់ ដោយអង្គការមួយដែលមានឈ្មោះថា សមាជិកសភាអាស៊ានដើម្បីសិទ្ធិមនុស្ស (APHR) ជុំវិញដំណើរទស្សនកិច្ចរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីទៅកាន់ប្រទេសមីយ៉ាន់ម៉ា។
សេចក្តីថ្លែងការណ៍ បញ្ជាក់ថា មានតែមនុស្សទុច្ចរិត និងបក្ខពួកតែប៉ុណ្ណោះ ដែលជ្រកក្រោមលេសសិទ្ធិមនុស្ស ហ៊ានធ្វើព្រងើយកន្តើយ ប៉ុន្តែចំពោះចេតនាល្អ និងកិច្ចខិតខំប្រឹងប្រែងរបស់សម្តេចតេជោនាយករដ្ឋមន្ត្រី ក្នុងការលើកកម្ពស់បរិយាកាសសន្តិភាព ការផ្សះផ្សា និងការបង្រួមបង្រួមគ្នា ក៏ដូចជា ការពារអាយុជីវិតប្រជាជននៅក្នុងប្រទេសមីយ៉ាន់ម៉ា ដែលបច្ចុប្បន្ននេះជាប្រទសកំពុងទទួលរងនូវវិបត្តិយ៉ាងធ្ងន់ធ្ងរ និងសង្គ្រាមស៊ីវិលអូសបន្លាយរាំរ៉ៃ និងការកើនឡើងនៃអសន្តិសុខរបស់មនុស្សធ្ងន់ធ្ងរ។
សេចក្តីការណ៍របស់រដ្ឋសភា បានគូសបញ្ជាក់ទៀតថា លោក ឆាលស៍ សាន់ទៀហ្គោ (Charles Santiago) ដែលបច្ចុប្បន្នជាប្រធានសមាជិកសភាអាស៊ានដើម្បីសិទ្ធិមនុស្ស (APHR) និងជាសមាជិកសភាមកពីគណបក្សប្រឆាំងនៅប្រទេសម៉ាឡេស៊ី ជារឿយៗត្រូវបានគេមើលឃើញថា មានជាប់ពាក់ព័ន្ធជាមួយនឹងសកម្មជននយោបាយជ្រុលនិយមមួយក្តាប់តូច និងក្រុមអ្នកនយោបាយដែលចង់បង្កសង្គ្រាម ឬក្រុមជនក្រៅច្បាប់មួយចំនួន។
រដ្ឋសភាកម្ពុជា បានចាត់ទុកការញុះញង់ឲ្យមានការរិះគន់ និងចេតនាប្រឆាំងនឹងរដ្ឋាភិបាលស្របច្បាប់ និងបេសកកម្មស្វែងរកសន្តិភាពរបស់សម្ដេចតេជោ ហ៊ុន សែន គឺជាការប្រឆាំងទាំងស្រុងចំពោះសន្តិភាព និងជាអំពើអសីលធម៌ ដោយសារតែពួកគេត្រូវបានលាងខួរក្បាល(បង្វក់) ឬខ្វះបញ្ញា សូម្បីតែការយល់ដឹងអំពីសុភវិនិច្ឆ័យ។
សេចក្តីថ្លែងការណ៍ បានសង្កត់ធ្ងន់ទៅ សមាជិកសភាអាស៊ានរូបនេះ គួរតែអប់រំខ្លួនឯងឡើងវិញ និងមានសុភាវធម៌គ្រប់គ្រាន់ ដើម្បីទទួលយកការពិត ក៏ដូចជាលទ្ធផលនៃដំណើរទស្សនកិច្ច ដូចជា បទឈប់បាញ់ចូលជាធរមានរហូតដល់ដំណាច់ឆ្នាំ២០២២, ការបើកទ្វារសម្រាប់ជំនួយមនុស្សធម៌។
សេចក្តីថ្លែងការណ៍ ឲ្យដឹងទៀតថា មូលដ្ឋានគ្រឹះនៃសន្តិភាព និងការផ្សះផ្សាជាតិនៅក្នុងប្រទេសមីយ៉ាន់ម៉ា បាននិងកំពុងចាក់ឬសជាបណ្តើរៗ ហើយនេះជាលទ្ធផលវិជ្ជមានដែលចាំបាច់សម្រាប់គ្រប់ភាគីពាក់ព័ន្ធយកមកធ្វើជាមូលដ្ឋាន ខណៈដែលអាស៊ានមានអាទិភាពផ្សេងទៀតជាច្រើនដែលត្រូវយកចិត្តទុកដាក់ និងមិនគួរក្លាយជាចំណាប់ខ្មាំងនៃវិបត្តិនៅប្រទេសមីយ៉ាន់ម៉ានោះឡើយ៕ អត្ថបទ៖ សេក ឧត្តម
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
