ប្រធានាធិបតីចិន លោក Xi Jinping បានអំពាវនាវឲ្យបណ្តាប្រទេស BRICS រួមគ្នាការពារពហុភាគីនិយម និងប្រព័ន្ធពាណិជ្ជកម្មពហុភាគី ហើយជំរុញកិច្ចសហប្រតិបត្តិការរបស់ប្លុកនេះឲ្យកាន់តែធំឡើង ខណៈដែលសង្គ្រាមពាណិជ្ជកម្ម និងពន្ធដារ បង្កឡើងដោយប្រទេសមួយចំនួន បានរំខានយ៉ាងខ្លាំងដល់សេដ្ឋកិច្ចពិភពលោក និងធ្វើឲ្យខូចដល់ច្បាប់ពាណិជ្ជកម្មអន្តរជាតិ។

លោក Xi បានធ្វើការកត់សម្គាល់ទាំងនេះ ខណៈពេលដែលចូលរួមក្នុងកិច្ចប្រជុំកំពូល BRICS តាមអនឡាញពីទីក្រុងប៉េកាំង កាលពីថ្ងៃចន្ទ (ទី៨ ខែកញ្ញា)។ លោកត្រូវបានចូលរួមដោយមេដឹកនាំផ្សេងទៀត រួមមានប្រធានាធិបតីប្រេស៊ីល លោក Luiz Inacio Lula da Silva ប្រធានាធិបតីរុស្ស៊ី លោក Vladimir Putin និងប្រធានាធិបតីអាហ្វ្រិកខាងត្បូង លោក Cyril Ramaphosa ក៏ដូចជាមេដឹកនាំមកពីប្រទេសអេហ្ស៊ីប អ៊ីរ៉ង់ ឥណ្ឌូនេស៊ី និងអារ៉ាប់រួម ព្រមទាំងអ្នកតំណាងមកពីឥណ្ឌា និងអេត្យូពី។

ក្នុងឱកាសនោះ លោក Xi បានពណ៌នាបណ្ដាសមាជិកប្លុក BRICS ថា ជាប្រទេសនាំមុខគេនៃប្រជាជាតិកំពុងអភិវឌ្ឍន៍សកលខាងត្បូង (Global South) ចំពេលមាននូវគោលនយោបាយអនុត្តរភាពនិយម ឯកតោភាគីនិយម និងគាំពារនិយម ដោយបានបញ្ជាក់ថា នេះគឺជាចំណុចសំខាន់មួយ ដើម្បីឲ្យប្រទេសទាំងនោះចាត់វិធានការ ដោយឈរលើស្មារតី BRICS ប្រកបដោយភាពបើកចំហ បរិយាបន្ន និងកិច្ចសហប្រតិបត្តិការឈ្នះ-ឈ្នះ។

មេដឹកនាំចិនរូបនេះបានអំពាវនាវឲ្យប្រកាន់ខ្ជាប់នូវពហុភាគីនិយម ដើម្បីការពារយុត្តិធម៌ និងយុត្តិធម៌អន្តរជាតិ។ លោកបានមានប្រសាសន៍ថា៖ «ប្រវត្តិសាស្ត្របង្រៀនយើងថា ពហុភាគីនិយម គឺជាសេចក្តីប្រាថ្នារួមគ្នារបស់ប្រជាជន និងនិន្នាការដ៏ទូលំទូលាយនៃសម័យកាលរបស់យើង។ វាផ្តល់នូវការគាំទ្រយ៉ាងសំខាន់ដល់សន្តិភាព និងការអភិវឌ្ឍសកល»។ លោកបានកត់សម្គាល់បន្ថែមថា គំនិតផ្តួចផ្តើមអភិបាលកិច្ចសកលដែលលោកបានស្នើឡើងថ្មីៗនេះ គឺសំដៅពង្រឹងសកម្មភាពសកលរួមគ្នា ដើម្បីឲ្យប្រព័ន្ធអភិបាលកិច្ចសកលកាន់តែយុត្តិធម៌ និងសមធម៌។

ដោយមានសមាជិកដើម គឺប្រទេសប្រេស៊ីល រុស្ស៊ី ឥណ្ឌា ចិន និងអាហ្រ្វិកខាងត្បូង ប្លុក BRICS បានពង្រីកបន្ថែមទៅជាក្រុមដែលមានសមាជិកពេញសិទ្ធិចំនួន ១១ និងប្រទេសជាដៃគូចំនួន ១០។ យន្តការកិច្ចសហប្រតិបត្តិការរបស់ BRICS ឥឡូវនេះ ត្រូវបានចាត់ទុកថា ជាវេទិកាដ៏សំខាន់សម្រាប់សាមគ្គីភាព និងកិច្ចសហប្រតិបត្តិការ ក្នុងចំណោមទីផ្សារដែលកំពុងរីកចម្រើន និងប្រទេសកំពុងអភិវឌ្ឍន៍៕