ទីភ្នាក់ងារឃ្លាំមើលការឡើងកម្ដៅផែនដីនៅអឺរ៉ុប Copernicus បាននិយាយនៅថ្ងៃអង្គារ (៩ កញ្ញា) នេះថា ភាពបំផ្លិចបំផ្លាញនៃចំហេះព្រៃ និងរលកកម្ដៅដ៏កំណាចក្នុងកំឡុងខែសីហា ឆ្នាំ២០២៥ បានធ្វើឱ្យខែនេះមានអាកាសធាតុក្តៅបំផុតទី៣ របស់ពិភពលោក នៅលើកំណត់ត្រា ដោយគូសបញ្ជាក់ពីភាពបន្ទាន់នៃការដោះស្រាយបម្រែបម្រួលអាកាសធាតុ និងត្រៀមទប់ស្កាត់ផលវិបាកដ៏គួរឱ្យភ័យខ្លាច។

ក្រុមតាមដានបម្រែបបម្រួលអាកាសធាតុនេះនិយាយថា សីតុណ្ហភាពជាមធ្យមទូទាំងពិភពលោកសម្រាប់ខែសីហា នៅកម្រិត ១,២៩អង្សាសេ លើសពីពេលវេលាមុនឧស្សាហកម្ម ដែលទាបជាងបន្តិចពីកំណត់ត្រាប្រចាំខែសីហា ដែលក្ដៅបំផុតទី១ គឺក្នុងឆ្នាំ២០២៣ និងទីពីរគឺនៅឆ្នាំ២០២៤។ តួលេខនេះមើលទៅអាចជាតិចតួច ប៉ុន្តែអ្នកវិទ្យាសាស្ត្រព្រមានថា សីតុណ្ហភាពបែបនេះកំពុងធ្វើឱ្យអាកាសធាតុអស្ថិរភាព និងព្យុះភ្លៀង ទឹកជំនន់ និងគ្រោះមហន្តរាយផ្សេងៗកាន់តែធ្ងន់ធ្ងរ និងញឹកញាប់ជាងមុន។

ទ្វីបអឺរ៉ុបភាគនិរតីបានជួបប្រទះព្រឹត្តិការណ៍អាកាសធាតុដ៏ធ្ងន់ធ្ងរជាច្រើនដូចជា រលកកម្ដៅទីបីនៃរដូវក្តៅដ៏ខ្លាំងក្លា ហើយអណ្ដាតភ្លើងបានឆាបឆេះពេញដីព្រៃអេស្ប៉ាញ និងព័រទុយហ្គាល់ ខណៈផ្នែកជាច្រើននៃទ្វីបអាស៊ីក៏ជួបសីតុណ្ហភាពលើសកម្រិតមធ្យម ក្នុងខែសីហាដ៏ក្តៅគគុក ដែលខិតជិតកម្រិតខ្ពស់បំផុត។

លើសពីនេះ មហាសមុទ្រពិភពលោក ដែលជួយគ្រប់គ្រងអាកាសធាតុរបស់ផែនដីដោយការស្រូបយកកម្ដៅលើសលប់ពីបរិយាកាស ក៏បានខិតទៅជិតកំណត់ត្រាសីតុណ្ហភាពខ្ពស់ផងដែរសម្រាប់ខែនោះ។ អ្នកវិទ្យាសាស្រ្តបានព្រមានថា សមុទ្រក្តៅគឺជាប់ពាក់ព័ន្ធនឹងអាកាសធាតុកាន់តែអាក្រក់ខ្លាំង៕