នាយករដ្ឋមន្ត្រីអង់គ្លេស លោក Keir Starmer បានជួបជាមួយប្រមុខអាជ្ញាធរប៉ាឡេស្ទីន លោក Mahmud Abbas កាលពីថ្ងៃចន្ទ (ទី៨ ខែកញ្ញា) នៅទីក្រុងឡុងដ្រ៍ ខណៈដែលរដ្ឋាភិបាលអង់គ្លេសឆ្ពោះទៅរកការទទួលស្គាល់រដ្ឋប៉ាឡេស្ទីន។

អ្នកនាំពាក្យការិយាល័យវិមាន Downing Street របស់លោក Starmer បានឲ្យដឹងនៅក្នុងសេចក្តីថ្លែងការណ៍មួយថា ក្នុងជំនួបនោះ មេដឹកនាំទាំង២ បានពិភាក្សា អំពី «តម្រូវការឲ្យមានដំណោះស្រាយបន្ទាន់មួយ ដើម្បីបញ្ចប់ការរងទុក្ខវេទនា និងទុរ្ភិក្សដ៏គួរឲ្យរន្ធត់» នៅក្នុងតំបន់ហ្កាហ្សា ព្រមទាំងការដោះលែងចំណាប់ថ្នូរដែលត្រូវបានឃុំខ្លួនដោយក្រុមហាម៉ាស។

លោក Abbas បានស្វាគមន៍ចំពោះ «ការសន្យារបស់ចក្រភពអង់គ្លេស ក្នុងការទទួលស្គាល់រដ្ឋប៉ាឡេស្ទីន នៅមុនមហាសន្និបាតអង្គការសហប្រជាជាតិ នាចុងខែនេះ ប្រសិនបើអ៊ីស្រាអែលមិនផ្លាស់ប្តូរទិសដៅរបស់ខ្លួនទេនោះ»។

គួរបញ្ជាក់ថា ប្រទេសជាច្រើន រួមទាំងអង់គ្លេស និងបារាំងផងដែរ បានប្រកាសថា ពួកគេមានបំណងទទួលស្គាល់រដ្ឋប៉ាឡេស្ទីន នៅអង្គការសហប្រជាជាតិ នាចុងខែកញ្ញានេះ។

រដ្ឋាភិបាលរបស់លោក Starmer បានបញ្ជាក់ថា ខ្លួននឹងចាត់វិធានការនេះ ប្រសិនបើអ៊ីស្រាអែល មិនអាចឈានដល់កិច្ចព្រមព្រៀងបទឈប់បាញ់ ក្នុងសង្រ្គាមដ៏បំផ្លិចបំផ្លាញ នៅតំបន់ហ្កាហ្សា ជាជម្លោះដែលបង្កឡើងដោយការវាយប្រហាររបស់ក្រុមសកម្មប្រយុទ្ធហាម៉ាសប៉ាឡេស្ទីន កាលពីខែតុលា ឆ្នាំ២០២៣៕