កងនាវាផ្ដល់ជំនួយសកល (GSF) ដែលតម្រង់ទៅតំបន់ហ្កាហ្សា បានឲ្យដឹងនៅថ្ងៃអង្គារ (ទី៩ ខែកញ្ញា) នេះថា ទូកដ៏ធំមួយគ្រឿងរបស់ខ្លួន ត្រូវបានវាយប្រហារដោយយានដ្រូន នៅក្នុងដែនទឹកទុយនីស៊ី តែអ្នកដំណើរ និងនាវិក ៦នាក់ មានសុវត្ថិភាពមិនរងរបួសអ្វីឡើយ។

អាជ្ញាធរទុយនីស៊ី បានឲ្យដឹងថា ការផ្ទុះមានប្រភពចេញពីក្នុងនាវា ហើយអ្នកនាំពាក្យឆ្មាំជាតិទុយនេស៊ី បានប្រាប់វិទ្យុ Mosaique FM ថា សេចក្ដីរាយការណ៍នៃការវាយប្រហារដោយយានដ្រូន នៅលើនាវា «មិនមានមូលដ្ឋានការពិតនោះទេ»។

GSF បានឲ្យដឹងនៅក្នុងសេចក្តីថ្លែងការណ៍មួយថា ទូកមានទង់ជាតិប្រទេសព័រទុយហ្គាល់ ដែលដឹកគណៈកម្មាធិការដឹកនាំរបស់កងនាវាផ្ដល់ជំនួយ បានរងការខូចខាតដោយភ្លើង នៅជាន់ខាងលើរបស់នាវា និងកន្លែងផ្ទុកនៅជាន់ខាងក្រោមនាវា។

កងនាវាផ្ដល់ជំនួយនេះ គឺជាគំនិតផ្តួចផ្តើមអន្តរជាតិមួយ ដែលស្វែងរកការផ្តល់ជំនួយមនុស្សធម៌ទៅកាន់តំបន់ហ្កាហ្សាដែលហែកហួរដោយសង្រ្គាម តាមរយៈទូកជនស៊ីវិលគាំទ្រដោយគណៈប្រតិភូមកពី ៤៤ប្រទេស។

សាក្សីរបស់ទីភា្នក់ងារសារព័ត៌មាន Reuters បានប្រាប់ឲ្យដឹងថា ក្រោយការវាយប្រហារនោះ មនុស្សរាប់សិបនាក់ បានប្រមូលផ្តុំគ្នានៅខាងក្រៅកំពង់ផែ Sidi Bou Said របស់ទុយនីស៊ី ជាកន្លែងដែលទូករបស់កងនាវាផ្ដល់ជំនួយ បានចូលចត ដោយគ្រវីទង់ជាតិប៉ាឡេស្ទីន និងស្រែកថា «ផ្ដល់សេរីភាពឲ្យប៉ាឡេស្ទីន»៕