ក្រុមមន្ត្រីបានប្រាប់ឲ្យដឹងថា ដោយប្រើប្រាស់កាំបិត ក្រុមឧទ្ទាម គឺកងកម្លាំងប្រជាធិបតេយ្យសម្ព័ន្ធមិត្ត (AFD) បានសម្លាប់ជនស៊ីវិលជាង ៥០នាក់យ៉ាងតិច នៅឯពិធីបុណ្យសពមួយ នៅភាគខាងកើតនៃប្រទេសកុងហ្គោ ដែលជាការវាយប្រហារទ្រង់ទ្រាយធំចុងក្រោយបង្អស់ពីសំណាក់ក្រុមគាំទ្រដោយរដ្ឋឥស្លាម ISIS។

អ្នកគ្រប់គ្រងតំបន់ លោក Macaire Sivikunula បាននិយាយថា ការវាយប្រហារនេះ គឺកើតមានកាលពីយប់ថ្ងៃចន្ទ (ទី៨ ខែកញ្ញា) នៅទីក្រុង Ntoyo ក្នុងដែនដី Lubero របស់ខេត្ត North Kivu។

លោកបានប្រាប់ថា៖ "ខ្ញុំអាចបញ្ជាក់ចំនួនអ្នកស្លាប់បណ្តោះអាសន្ន ៥០នាក់។ ជនរងគ្រោះត្រូវបានចាប់ខ្លួន នៅក្នុងពិធីកាន់ទុក្ខមួយ នៅក្នុងភូមិនៃទីក្រុង Ntoyo វេលាម៉ោងប្រហែល ៩យប់ (ម៉ោងក្នុងស្រុក) ហើយពួកគេភាគច្រើនត្រូវបានសម្លាប់ដោយកាំបិត។ ប្រតិបត្តិការស្វែងរកកំពុងបន្តធ្វើ»។

តែលោកវរសេនីយ៍ឯក Alain Kiwewa អ្នកគ្រប់គ្រងយោធា សម្រាប់ទីក្រុង Lubero បានប្រាប់សារព័ត៌មានរ៉យទ័រថា ចំនួនអ្នកស្លាប់មានប្រហែល ៦០នាក់ ហើយអាចកើនឡើង ខណៈដែលនៅតែមានមនុស្សបាត់ខ្លួននៅឡើយ។

ADF ស្ថិតក្នុងចំណោមកងជីវពលមួយចំនួនដែលជាប់ក្នុងជម្លោះ ជុំវិញបញ្ហាដីធ្លី និងធនធាន នៅភាគខាងកើតសម្បូរដោយរ៉ែរបស់កុងហ្គោ។ កងទ័ពកុងហ្គោ និងសម្ព័ន្ធមិត្តរបស់ខ្លួន គឺអ៊ូហ្គង់ដា បានឲ្យដឹងថា ពួកគេបានបង្កើនប្រតិបត្តិការប្រឆាំងនឹង ADF ក្នុងប៉ុន្មានសប្តាហ៍ថ្មីៗនេះ៕