ប្រភពពីរដ្ឋាភិបាលឥណ្ឌា និងសហភាពអឺរ៉ុប (EU) បានឲ្យដឹងថា ប្រទេសឥណ្ឌា និង EU កំពុងរៀបចំការចរចាពាណិជ្ជកម្មដ៏សំខាន់មួយ នៅទីក្រុងញូវដេលី ក្នុងសប្តាហ៍នេះ ដោយប្រឹងប្រែងដោះស្រាយភាពខុសគ្នា លើវិស័យកសិកម្ម ទឹកដោះគោ និងរបាំងមិនមែនពន្ធ ដើម្បីបំពេញការបញ្ចប់ប្រកបដោយមហិច្ឆិតានៃកាលកំណត់ចុងឆ្នាំ សម្រាប់កិច្ចព្រមព្រៀង។

ទីក្រុងញូវដេលីកំពុងប្រឹងប្រែងធ្វើឲ្យកាន់តែស៊ីជម្រៅនូវភាពជាដៃគូជាសកល បន្ទាប់ពីប្រធានាធិបតីអាមេរិក លោក Donald Trump ដំឡើងពន្ធទ្វេដងលើទំនិញឥណ្ឌាដល់ ៥០ភាគរយ កាលពីខែមុន ជុំវិញការទិញប្រេងពីរុស្ស៊ី ដោយប៉ះពាល់ដល់ការនាំចេញនានា ដូចជាវិស័យវាយនភ័ណ្ឌ ស្បែក និងសារធាតុគីមីជាដើម។

ការចរចាដែលត្រូវបានបានចាប់ផ្តើមឡើងវិញនៅឆ្នាំ២០២២ បានធ្វើឲ្យមានវឌ្ឍនភាពយ៉ាងឆាប់រហ័ស ចាប់តាំងពីលោក Trump បានជាប់ឆ្នោតឡើងវិញ។ ទីក្រុងប្រ៊ុចសែលដែលប្រឈមនឹងពន្ធរបស់លោក Trump ក៏បានពន្លឿនការជំរុញរបស់ខ្លួនផងដែរ ដើម្បីបង្កើតសម្ព័ន្ធភាពពាណិជ្ជកម្ម ដោយមាននូវកិច្ចព្រមព្រៀងជាមួយម៉ិកស៊ិក និងបណ្តាប្រទេសនៃប្លុកពាណិជ្ជកម្ម Mercosur របស់អាមេរិកខាងត្បូង និងបង្កើនកិច្ចពិភាក្សាជាមួយឥណ្ឌា ឥណ្ឌូនេស៊ី និងអារ៉ាប់រួម។

សន្ធិសញ្ញាណាមួយជាមួយ EU ក៏អាចទាក់ទាញឥណ្ឌាឲ្យកាន់តែខិតទៅកៀកនឹងលោកខាងលិចផងដែរ បន្ទាប់ពីមានភាពតានតឹង ដោយសារដំណើរទស្សនកិច្ចនាពេលថ្មីៗនេះរបស់នាយករដ្ឋមន្ត្រី លោក Narendra Modi ទៅកាន់ប្រទេសចិន សម្រាប់កិច្ចប្រជុំកំពូលដែលចូលរួមដោយប្រធានាធិបតីរុស្ស៊ី លោក Vladimir Putin និងបណ្ដាមេដឹកនាំដទៃទៀត៕