អង្គការសហប្រជាជាតិ (UN) នៅថ្ងៃអង្គារ (ទី៩ ខែកញ្ញា) នេះ បានឲ្យដឹងថា ខ្លួនកំពុងស្វែងរកទឹកប្រាក់ ១៣៩,៦លានដុល្លារ ដើម្បីជួយមនុស្សកន្លះលាននាក់រងគ្រោះដោយសាររញ្ជួយដីដែលបានវាយប្រហារភាគខាងកើតអាហ្វហ្គានីស្ថាន ហើយស្ថាប័នអន្តរជាតិមួយនេះ បានជំរុញឲ្យម្ចាស់ជំនួយនានាទុកដោយឡែកសិននូវក្ដីបារម្ភ អំពីអាជ្ញាធរតាលីបង់។

គួរបញ្ជាក់ថា រញ្ជួយដីដ៏អាក្រក់បំផុតនៅអាហ្វហ្គានីស្ថានជាលើកដំបូង ក្នុងរយៈពេលជាច្រើនឆ្នាំ ដែលបានកើតមាននៅយប់ថ្ងៃទី៣១ ខែសីហា ដល់ថ្ងៃទី១ ខែកញ្ញា បានឆក់យកជីវិតមនុស្សជាង ២.២០០នាក់ ហើយត្រូវបានបន្តដោយរលករញ្ជួយដ៏ខ្លាំងជាបន្តបន្ទាប់។ គ្រោះធម្មជាតិនេះបានធ្វើឲ្យមនុស្សរាប់ម៉ឺននាក់គ្មានផ្ទះសម្បែង ដោយអ្នកខ្លះភ័យបារម្ភពីការមានបំណាក់ដីបន្ថែមទៀត។

លោក Indrika Ratwatte អ្នកសម្របសម្រួលផ្នែកមនុស្សធម៌របស់ UN ប្រចាំប្រទេសអាហ្វហ្គានីស្ថាន បាននិយាយថា សីតុណ្ហភាពត្រជាក់ដែលនឹងចូលមកដល់ក្នុងរយៈពេលប៉ុន្មានសប្តាហ៍ខាងមុខនេះ នឹងមានន័យថា ស្ថានភាពកាន់តែលំបាកឡើងៗ សម្រាប់អ្នកនៅរស់រានមានជីវិត នៅតាមតំបន់ភ្នំដាច់ស្រយាល។

នៅទីក្រុងហ្សឺណែវ ប្រទេសស្វីស លោក Ratwatte បានប្រាប់សន្និសីទសារព័ត៌មានថា៖ «នេះគឺជាពេលមួយ ដែលសហគមន៍អន្តរជាតិត្រូវតែបង្កើនកិច្ចប្រឹងប្រែង និងបង្ហាញពីសាមគ្គីភាពជាមួយប្រជាជនដែលបានស៊ូទ្រាំនឹងការរងទុក្ខយ៉ាងច្រើនរួចទៅហើយ»។ លោកបានបន្ថែមថា៖ «ពេលនេះជីវិតរបស់ពួកគេ កំពុងប្រឈមនឹងហានិភ័យ។ ២ ឬ ៣សប្តាហ៍ទៀត សីតុណ្ហភាពរដូវរងា នឹងចូលមកដល់ ដូច្នេះ សហគមន៍នៅតំបន់ភ្នំខ្ពស់ៗ នឹងកាន់តែលំបាក»៕