នៅថ្ងៃអង្គារនេះ ជនប៉ាឡេស្ទីន នាំគ្នាតវ៉ាប្រឆាំងនៅកណ្តាលទីក្រុងហ្កាហ្សា ដោយពួកគេសច្ចាថា នឹងមិនចាកចេញពីទីក្រុងមួយនេះជាដាច់ខាត ក្រោយអ្នកស្រុកទទួលបានខិត្តប័ណ្ណអ៊ីស្រាអែល បញ្ជាឲ្យពួកគេចាកចេញជាបន្ទាន់ ។

អ្នកស្រុកហ្កាហ្សា បានជួបជុំគ្នានៅទីលានចតុរង្គ al-Saraya ស្រែកពាក្យស្លោក គ្រវីទង់ប៉ាឡេស្ទីន និងកាន់បដា ។

លោក Yehia al-Madhoun ដែលជាសាស្ត្រាចារ្យសាកលវិទ្យាល័យមួយរូប និយាយថា ពួកយើងមកទីនេះ ដើម្បីបញ្ជូនសារថា ពួកយើងនៅហ្កាហ្សា ក្នុងស្ថានភាពរឹងមាំ អត់ធ្មត់ និងខ្ជាប់ខ្ជួន ហើយទីក្រុងហ្កាហ្សាគឺទីក្រុងដ៏ស្រស់ស្អាតនេះ នឹងបន្តរឹងមាំ និងអត់ធ្មត់ ។

ពលរដ្ឋនៅក្នុងទីក្រុងមួយនេះ ដែលធ្លាប់មានជនប៉ាឡេស្ទីនរស់នៅប្រហែល ១លាននាក់ មុនពេលសង្រ្គាមផ្ទុះឡើង បានមើលឃើញការកាប់សម្លាប់អស់រយៈពេលជាច្រើនសប្តាហ៍មកហើយ ចាប់តាំងពីរដ្ឋាភិបាលអ៊ីស្រាអែល រៀបចំផែនការទប់ទល់ជាមួយក្រុមហាម៉ាស នៅទីក្រុងហ្កាហ្សាដែលពួកគេចាត់ទុកថាជាតំបន់កាន់កាប់ចុងក្រោយគេរបស់ក្រុមជីវពលមួយនេះ ។

យោធាអ៊ីស្រាអែលនិយាយនៅថ្ងៃអង្គារនេះថា ពួកគេនឹងបង្កើនការវាយប្រហារទីក្រុងហ្កាហ្សា ហើយនិងបាននិយាយប្រាប់ឲ្យអ្នកស្រុក ចាកចេញជាបន្ទាន់ពីទីនេះ ។

ដោយឡែក លោកនាយករដ្ឋមន្រ្តី Benjamin Netanyahu បានចេញការព្រមានស្រដៀងគ្នា ពេលដែលអ៊ីស្រាអែលបង្កើនការទម្លាក់គ្រាប់បែក ជាការត្រៀមខ្លួនសម្រាប់ប្រតិបត្តិការសឹក ដើម្បីរឹបអូសយកទីក្រុងហ្កាហ្សា បើទោះបីជាមានការអំពាវនាវរបស់សកលលោក ឲ្យបញ្ចប់សង្រ្គាមក៏ដោយ ៕