ប្រធានាធិបតីម៉ុលដាវី លោកស្រី Maia Sandu នៅថ្ងៃអង្គារ (ទី៩ ខែកញ្ញា) នេះ បានប្រាប់សមាជិកសភាអឺរ៉ុបថា រុស្ស៊ីកំពុងប្រើប្រាស់ការជ្រៀតជ្រែក «គ្មានដែនកំណត់« ដើម្បីព្យាយាមអូសប្រទេសរបស់លោកស្រីឲ្យត្រលប់ទៅស្ថិតក្រោមឥទ្ធិពលរបស់ខ្លួន អំឡុងពេលមានការបោះឆ្នោតសភាសំខាន់ៗ ក្នុងខែនេះ។

ក្នុងសុន្ទរកថានៅឯសភាអឺរ៉ុប នាទីក្រុង Strasbourg ប្រទេសបារាំង លោកស្រី Sandu បាននិយាយថា៖ «នៅថ្ងៃទី២៨ ខែកញ្ញា ឆ្នាំ២០២៥ ប្រទេសម៉ុលដាវី នឹងរៀបចំការបោះឆ្នោតដ៏មានសារៈសំខាន់បំផុតមួយ នៅក្នុងប្រវត្តិសាស្ត្ររបស់ប្រទេស»។

លោកស្រីបានបន្តថា៖ «បច្ចុប្បន្ននេះ យើងប្រឈមជាមួយសង្រ្គាមកូនកាត់គ្មានដែនកំណត់ ជាទំហំដែលមិនធ្លាប់បានឃើញ មុនពេលមានការលុកលុយទាំងស្រុងលើអ៊ុយក្រែន។ គោលដៅរបស់វិមានក្រឹមឡាំង គឺច្បាស់លាស់ ពោលគឺដើម្បីមានឥទ្ធិពលលើម៉ុលដាវី តាមរយៈសន្លឹកឆ្នោត ដើម្បីប្រើវាប្រឆាំងនឹងអ៊ុយក្រែន និងដើម្បីប្រែក្លាយយើងទៅជាកន្លែងចាប់ផ្តើមការវាយប្រហារកូនកាត់នៅក្នុងសហភាពអឺរ៉ុប»។

គួរបញ្ជាក់ថា លោកស្រី Sandu និងសម្ព័ន្ធមិត្តអ៊ឺរ៉ុបរបស់លោកស្រី បានចោទប្រកាន់ទីក្រុងមូស្គូម្តងហើយម្តងទៀតថា បានប៉ុនប៉ងធ្វើឲ្យមានអស្ថិរភាពដល់អតីតសាធារណរដ្ឋសូវៀតមានប្រជាជនចំនួន ២,៦លាននាក់ ជាប្រទេសដែលស្ថិតនៅចន្លោះអ៊ុយក្រែនដែលហែកហួរដោយសង្រ្គាម និងសហភាពអឺរ៉ុប និងសមាជិករបស់អង្គការណាតូ គឺរ៉ូម៉ានី។

ក្នុងនាមជាអ្នករិះគន់ឥតសំចៃលើរុស្ស៊ី ជាពិសេសចាប់តាំងពីការចាប់ផ្តើមនៃការលុកលុយលើអ៊ុយក្រែននៅឆ្នាំ២០២២ លោកស្រី Sandu បានដឹកនាំប្រទេសម៉ុលដាវីឆ្ពោះទៅកាន់កិច្ចពិភាក្សាផ្លូវការពីសមាជិកភាពសហភាពអឺរ៉ុប ដែលបានចាប់ផ្តើមនៅក្នុងខែមិថុនា ឆ្នាំ២០២៤៕