ក្នុងរយៈពេលប៉ុន្មាននាទីនៃការកាត់ទោសដាក់ពន្ធនាគាររយៈពេល ១ ឆ្នាំកាលពីថ្ងៃអង្គារ លោក ថាក់ស៊ីន ស៊ីណាវ៉ាត់ របស់ប្រទេសថៃ បានបញ្ជាក់យ៉ាងច្បាស់ថារូបលោកពុំមានគម្រោងលាក់ខ្លួនពីជីវិតសាធារណៈនោះទេ។

លោក ថាក់ស៊ីន ស៊ីណាវ៉ាត់ ត្រូវបានបញ្ជូនទៅដល់ពន្ធនាគារ Remand របស់ទីក្រុងបាងកក កាលពីថ្ងៃអង្គារ ៩ កញ្ញា ជាការចាប់ផ្ដើមអនុវត្តទោសរបស់លោក បន្ទាប់ពីសាលក្រមរបស់តុលាការកំពូលថៃ ដែលបានបញ្ជូនលោកឱ្យជាប់ពន្ធនាគារឡើងវិញរយៈពេល ១ឆ្នាំ។

ដោយបានឆ្លងផុតរដ្ឋប្រហារជាច្រើនលើក ការវាយបកពីតុលាការ និងការនិរទេសខ្លួន អ្នកនយោបាយដ៏មានឥទ្ធិពលបំផុតរបស់ប្រទេសថៃក្នុងសតវត្សនេះ បានបង្ហាញថារូបលោកនៅតែមានផែនការពង្រីកវិសាលភាពជិតពីរទសវត្សរ៍របស់គ្រួសារនេះលើនយោបាយថៃ។

លោកថាក់ស៊ីន វ័យ៧៦ឆ្នាំ រូបនេះ បានសរសេរជាភាសាថៃលើបណ្ដាញសង្គម X ថា ថ្ងៃនេះខ្ញុំជ្រើសរើសការទន្ទឹងរង់ចាំ ហើយបិទអ្វីៗគ្រប់យ៉ាងពីអតីតកាល ទាំងជម្លោះផ្លូវច្បាប់ និងជម្លោះណាមួយដែលកើតឡើង ឬជាប់ពាក់ព័ន្ធជាមួយខ្ញុំ។ខ្ញុំនឹងបន្តរឹងមាំទាំងផ្លូវកាយទាំងផ្លូវចិត្តដើម្បីចំណាយពេលនៅសល់ក្នុងជីវិតរបស់ខ្ញុំបម្រើព្រះមហាក្សត្រ ទឹកដីរបស់ថៃ និងប្រជាជនថៃ ទោះក្នុងឋានៈរបស់ខ្ញុំជាអ្វីក៏ដោយ ចាប់ពីពេលនេះតទៅ ។

យោងតាមលោក Titipol Phakdeewanich សាស្ត្រាចារ្យវិទ្យាសាស្ត្រនយោបាយនៃសាកលវិទ្យាល័យ Ubon Ratchathani  បានឲ្យដឹងថា ការសម្រេចចិត្តរបស់លោកថាក់ស៊ីន ក្នុងការវិលត្រឡប់ពីដំណើរក្រៅប្រទេសមួយថ្ងៃមុននេះ ដើម្បីមកទទួលទោសការជាប់ពន្ធនាគារដ៏ខ្លី ល្អជាការរត់ចោលប្រទេសទាំងស្រុង បង្ហាញថាលោកបានប្តេជ្ញាចិត្តក្នុងការតតាំងក្រោយតុលាការអនុវត្តន៍ទោសជាប់ពន្ធនាគារ១ឆ្នាំពេញ៕