វាយកូនបាល់៖ លោក ទេព រិទ្ធីវិទ្ធ អគ្គលេខាធិការសហព័ន្ធកីឡាវាយកូនបាល់កម្ពុជា បានធ្វើការវាយតម្លៃខ្ពស់ចំពោះកម្រិតសមត្ថភាពរបស់កីឡាករ-កីឡាការិនី រួមទាំងអាជ្ញាកណ្ដាល-ចៅក្រមដែលមានការរីកចម្រើនហួសពីការទទួលយកបាន បើទោះបីសហព័ន្ធបានខកខានរៀបចំការប្រកួតថ្នាក់ជាតិជាង ២ឆ្នាំកន្លងមកដោយសារជំងឺរាតត្បាតជាសកលកូវីដ-១៩ ក្ដី។
ការបង្ហាញនូវសុទិដ្ឋិនិយមរបស់ប្រមុខសហព័ន្ធនេះ ធ្វើឡើងក្នុងពិធីបិទការប្រកួតកីឡាវាយកូនបាល់ជ្រើសរើសជើងឯកថ្នាក់ជាតិប្រចាំឆ្នាំ២០២១ ក្រោយដំណើរការប្រកួតរយៈពេល ៤ថ្ងៃចាប់ពីថ្ងៃទី២២ ដល់ថ្ងៃទី២៥ ខែមករា ឆ្នាំ២០២២ ម្សិលមិញនៅមជ្ឈមណ្ឌលកីឡា CCC។ អគ្គលេខាធិការសហព័ន្ធដដែលបានបញ្ជាក់ថា រយៈពេល ២ឆ្នាំកន្លះមកហើយដែលសហព័ន្ធបានខកខានរៀបចំការប្រកួតថ្នាក់ជាតិផ្សេងៗ។ តែយ៉ាងណាលោកសង្កេតឃើញកីឡាករ-កីឡាការិនីម្នាក់ៗនៅតែខិតខំប្រឹង ដែលធ្វើឲ្យពួកគេសម្រេចបានលទ្ធផលដ៏ល្អប្រសើរក្នុងការប្រកួតជើងឯកថ្នាក់ជាតិឆ្នាំនេះ។ រីឯអាជ្ញាកណ្ដាល-ចៅក្រម រួមទាំងអ្នកបម្រើសេវេបាល់ក៏ធ្វើបានល្អដែរ។ ហេតុនេះលោករំពឹងថា នឹងទទួលបានលទ្ធផលល្អប្រសើរលើសពីការរំពឹងទុកមួយ ក្នុងដំណើរឆ្ពោះទៅស៊ីហ្គេមឆ្នាំ២០២៣។
ចំពោះការប្រកួតជើងឯកថ្នាក់ជាតិឆ្នាំនេះបានរៀបចំចំនួន ៤វិញ្ញាសាដោយមានកីឡាករ-កីឡាការិនី ៥១នាក់មកពីរាជធានី-ខេត្តចំនួន ៨ចូលរួម។ ជាលទ្ធផលវាយឯកត្តជននារី លេខ១ កីឡាការិនី ញ៉ែម ស្រីណុច មកពីខេត្តសៀមរាប, លេខ២ កីឡាការិនី ឈីវ អប្សរ៉ា មកពីក្រសួងសេដ្ឋកិច្ច និងហិរញ្ញវត្ថុ និងលេខ៣ កីឡាការិនី ច័ន្ទ សុវណ្ណលីនណា មកពីខេត្តសៀមរាប។ វិញ្ញាសាឯកត្តជនយុវជនអាយុក្រោម ១៨ឆ្នាំ លេខ១ កីឡាករ ឈាង ច័ន្ទមុន្នី មកពីក្លិបអូឡាំពិក ខណៈលេខ២ កីឡាករ ឡេង ឃ្លាង មកពីអង្គការអរុណរៈ និងលេខ៣ កីឡាករ វឿន វុទ្ធី មកពីខេត្តសៀមរាប។ វិញ្ញាសាឯកត្តជនបុរសម្នាក់ទល់ម្នាក់ លេខ១ កីឡាករ ប៊ុន កេន្នី មកពីក្រសួងសេដ្ឋកិច្ច និងហិរញ្ញវត្ថុ ខណៈលេខ២ កីឡាករ ឡុង សំនៀង និងលេខ៣ កីឡាករ ឱ សារិទ្ធ មកពីក្រសួងការពារជាតិ និងលេខ៣ ដូចគ្នា។ វិញ្ញាសាវាយគូបុរស លេខ១ កីឡាករ ឡុង សំនៀង និងកីឡាករ ឱ សារិទ្ធ មកពីក្រសួងការពារជាតិ ខណៈលេខ២ កីឡាករ ប៊ុន កេន្នី និង ម៉ន ភក្ដី មកពីក្រសួងសេដ្ឋកិច្ច និងហិរញ្ញវត្ថុ និងលេខ៣ កីឡាករ ឃ្លាំង ពន្លក និងកីឡាករ អ៊ិត ប៊ុនធា មកពីក្រសួងការពារជាតិ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
