ប្រធានាធិបតីអ៊ុយក្រែន លោក Volodymyr Zelenskyy បានទាមទារឱ្យសហរដ្ឋអាមេរិក ឆ្លើយតបទៅនឹងការវាយប្រហារ "ដ៏ព្រៃផ្សៃ" របស់រុស្ស៊ី ដែលលោកនិយាយថា បានសម្លាប់មនុស្សជាង ២០នាក់ សុទ្ធតែជាជនស៊ីវិលវ័យចំណាស់ ក្នុងអ្វីដែលអាជ្ញាធរអ៊ុយក្រែននិយាយថាជានិវត្តន៍ជន ដែលកំពុងទៅយកប្រាក់សោធននៅភូមិភាគខាងកើតនៃប្រទេស។

ក្នុងការបង្ហោះនៅលើបណ្ដាញសង្គម X លោក Zelenskyy បានរៀបពីការវាយប្រហារកាលពីថ្ងៃអង្គារ (៩ កញ្ញា) នោះថា "វាយដោយផ្ទាល់ទៅលើជនស៊ីវិលសាមញ្ញធម្មតា។ លោក Zelenskyy បាននិយាយថា គ្រាប់បែកប្រើប្រព័ន្ធទូរបញ្ជាមួយគ្រាប់បានវាយប្រហារលើភូមិ Yarova ចម្ងាយប្រហែល ២៤គីឡូម៉ែត្រ ពីទីក្រុង Sloviansk ដែលជាបន្ទាយរឹងមាំរបស់អ៊ុយក្រែន និងជាច្រើនគីឡូម៉ែត្រនៅពីក្រោយសមរភូមិជួរមុខ។

សេវាសង្គ្រោះបន្ទាន់របស់រដ្ឋបានបញ្ជាក់ថា មនុស្សយ៉ាងតិច ២៤នាក់បានស្លាប់ និងជាច្រើននាក់ផ្សេងទៀតរងរបួស។ អភិបាលតំបន់ លោក Vadym Filashkin បាននិយាយថា អ្នកស្លាប់ទាំងអស់សុទ្ធតែជាមនុស្សវ័យចំណាស់។ រុស្ស៊ីមិនបានធ្វើអត្ថាធិប្បាយភ្លាមៗអំពីការវាយប្រហារនោះទេ ហើយទីក្រុងមូស្គូ តែងបដិសេធមិនកំណត់គោលដៅលើជនស៊ីវិលឡើយ ប៉ុន្តែមនុស្សរាប់ម៉ឺននាក់បានស្លាប់ ចាប់តាំងពីប្រតិបត្តិការយោធាទ្រង់ទ្រាយធំរបស់ខ្លួននៅក្នុងខែកុម្ភៈ ឆ្នាំ២០២២មក៕