អគ្គលេខាធិការអង្គការសហប្រជាជាតិ លោក Antonio Guterres កាលពីថ្ងៃអង្គារបានជំរុញឱ្យរដ្ឋជាសមាជិកធ្វើឱ្យមានតុល្យភាពឡើងវិញនូវការចំណាយផ្នែកយោធា និងអាទិភាពអភិវឌ្ឍន៍។ ប្រមុខអង្គការសហប្រជាជាតិបាននិយាយនៅពេលចាប់ផ្តើមចេញរបាយការណ៍ថ្មីមានចំណងជើងថា «សន្តិសុខដែលយើងត្រូវការ ការធ្វើឱ្យមានតុល្យភាពឡើងវិញនូវការចំណាយផ្នែកយោធាសម្រាប់អនាគតប្រកបដោយនិរន្តរភាព និងសន្តិភាព» ថា វាជាញឹកញាប់ធ្វើឲ្យអន្តរាយ ជំរុញការប្រកួតប្រជែងសព្វាវុធ និងធ្វើឲ្យមានការមិនទុកចិត្តគ្នាកាន់តែខ្លាំង។

លោក Guterres បាននិយាយថា «ពិភពលោកដែលមានសុវត្ថិភាពកាន់ច្រើន ចាប់ផ្តើមដោយការវិនិយោគក្នុងការប្រយុទ្ធប្រឆាំងភាពក្រីក្រដូចដែលយើងបានធ្វើនៅក្នុងការប្រយុទ្ធប្រឆាំងសង្គ្រាម»។ លោកបាននិយាយថា ការចំណាយលើផ្នែកយោធាជាសកលបានកើនឡើងដល់កម្រិតខ្ពស់បំផុតចំនួន២,៧សែនកោដិលានដុល្លារក្នុងឆ្នាំ២០២៤ដែលមានជិត១៣ដងនៃចំនួនជំនួយអភិវឌ្ឍន៍ផ្លូវការពីប្រទេសអ្នកមានបំផុតរបស់ពិភពលោក និង៧៥០ដងនៃថវិកាធម្មតារបស់អង្គការសហប្រជាជាតិក្នុងឆ្នាំ២០២៤។

ជាមួយគ្នានេះ គោលដៅអភិវឌ្ឍន៍ប្រកបដោយនិរន្តរភាព (SDG) មានតែមួយភាគប្រាំប៉ុណ្ណោះដែលកំពុងដំណើរការ។ លោកបានព្រមានថា គម្លាតហិរញ្ញប្បវត្ថុកំពុងកើនឡើង។ លោក Guterres បាននិយាយថា របាយការណ៍នេះគឺជាការអំពាវនាវឱ្យគិតឡើងវិញអំពីអាទិភាពនិងធ្វើឱ្យមានតុល្យភាពឡើងវិញនូវការវិនិយោគសកលឈានទៅរកសន្តិសុខដែលពិភពលោកពិតជាត្រូវការ។

ការចំណាយលើវិស័យយោធាសកលត្រូវបានព្យាករថានឹងឈានដល់ ៤,៧ ទៅ៦,៦សែនកោដិដុល្លារនៅឆ្នាំ២០៣៥ប្រសិនបើនិន្នាការបច្ចុប្បន្ននៅតែបន្ត។ យោងតាមរបាយការណ៍បានឱ្យដឹងថា ការបង្វែរធនធានដ៏ធំឆ្ពោះទៅរកការប្រើប្រាស់ជាប្រយោជន៍យោធា បង្កការគំរាមកំហែងធ្ងន់ធ្ងរដល់អនាគតរបស់មនុស្សជាតិ ដោយធ្វើឱ្យអន្តរាយដល់សន្តិភាព និងការអភិវឌ្ឍន៍ប្រកបដោយនិរន្តរភាព។