រដ្ឋមន្ត្រីក្រសួងការពារជាតិ លោក Richard Marles បាននិយាយនៅថ្ងៃពុធ (ទី១០ ខែកញ្ញា) នេះថា ប្រទេសអូស្ត្រាលីនឹងចំណាយប្រាក់ចំនួន ១,៧ពាន់លានដុល្លារអូស្ត្រាលី (១,១ពាន់លានដុល្លារ) លើការផលិតយានដ្រូនវាយប្រហារក្រោមទឹកដែលអភិវឌ្ឍក្នុងស្រុករាប់សិបគ្រឿង។

លោក Marles បានឲ្យដឹងថា ក្រុមដំបូងនៃយានដ្រូនឈ្មោះ Ghost Sharks ដែលអាចបំបាំងកាយបាន និងវាយប្រហាររយៈចម្ងាយឆ្ងាយ នឹងត្រូវបានបញ្ជូនទៅកងទ័ពជើងទឹកអូស្ត្រាលី ក្នុងខែមករា ឆ្នាំក្រោយ ក្រោមកិច្ចសន្យារយៈពេល ៥ឆ្នាំ ជាមួយក្រុមហ៊ុន Anduril Australia ដែលមានមូលដ្ឋាននៅទីក្រុងស៊ីដនី។

លោក Marles បានប្រាប់អ្នកសារព័ត៌មាននៅទីក្រុងស៊ីដនីថា៖ «អូស្ត្រាលីកំពុងនាំមុខគេលើពិភពលោកទាក់ទងនឹងសមត្ថភាពយោធាក្រោមទឹកស្វយ័ត»។ លោកបានបន្តថា យានក្រោមទឹកដ៏ធំ និងស្វយ័តនេះ នឹងជំរុញយ៉ាងខ្លាំងក្លាដល់សមត្ថភាពធ្វើសង្គ្រាមក្រោមសមុទ្ររបស់អូស្ត្រាលី ដោយបំពេញបន្ថែមកងនាវាមុជទឹកដើរដោយបច្ចេកវិទ្យានុយក្លេអ៊ែររបស់សហរដ្ឋអាមេរិក។

គួរបញ្ជាក់ថា នាវាមុជទឹកទី១ ក្នុងចំណោមនាវាមុជទឹកទាំងនោះដែលត្រូវបានផ្តល់ក្រោមភាពជាដៃគូរបស់សម្ព័ន្ធ AUKUS ជាមួយសហរដ្ឋអាមេរិក និងចក្រភពអង់គ្លេស នឹងមិនត្រូវបានបញ្ជូនទៅអូស្ត្រាលីរហូតដល់ឆ្នាំ២០៣២។

យ៉ាងណាក្ដី លោក Marles នឹងមិននិយាយឲ្យបានច្បាស់លាស់ថា តើយានដ្រូន Ghost Sharks ចំនួនប៉ុន្មានគ្រឿង នឹងត្រូវបានផលិតនោះឡើយ។ ប៉ុន្តែលោកបានបញ្ជាក់ថា កងទ័ពជើងទឹកអូស្ត្រាលីនឹងត្រូវបានផ្តល់ជា «រាប់សិបគ្រឿង» ក្នុងរយៈពេល ៥ឆ្នាំខាងមុខ៕