នគរបាលបារាំងបានបាញ់ឧស្ម័នបង្ហូរទឹកភ្នែកទៅលើក្រុមបាតុករយុវជន ដែលបានប្រមូលផ្តុំនៅមុខសាសាវិទ្យាល័យមួយ ក្នុងទីក្រុងប៉ារីស នាព្រឹកថ្ងៃពុធ (ទី១០ ខែកញ្ញា) នេះ ជាផ្នែកនៃទិវាចលនាតវ៉ាទូទាំងប្រទេសដែលដាក់ឈ្មោះដោយក្រុមអ្នកចូលរួមថា «Block Everything» (រារាំងអ្វីៗគ្រប់យ៉ាង)។

អំឡុងការតវ៉ានោះ ក្រុមបាតុករទាំងនោះក៏បានព្យាយាមបិទផ្លូវនានា ក្នុងរដ្ឋធានីផងដែរ តែការរំខានចរាចរណ៍ នៅផ្លូវក្រវ៉ាត់ក្រុងប៉ារីស ហាក់ដូចជាមានតិចតួច។ រហូតមកដល់ពេលនេះ នគរបាលក្រុងប៉ារីស បានរាយការណ៍ពីការចាប់ខ្លួនមនុស្ស ៧៥នាក់ ដែលជាផ្នែកនៃចលនានេះ។

ក្រុមអ្នកស្រាវជ្រាវ និងមន្ត្រី បានឲ្យដឹងថា ចលនានេះបានចាប់ផ្ដើមផ្ទុះឡើងតាមប្រព័ន្ធអ៊ីនធឺណេត កាលពីខែឧសភា ក្នុងចំណោមក្រុមស្តាំនិយម តែចាប់តាំងពីពេលនោះមក វាត្រូវបានគ្របដណ្ដប់ដោយក្រុមឆ្វេងនិយម និងឆ្វេងនិយមជ្រុល។

ដោយសារកង្វះខាតនូវអ្នកដឹកនាំកណ្តាលនិយម និងត្រូវបានរៀបចំដោយមិនផ្លូវការ តាមរយៈបណ្ដាញសង្គម និងកម្មវិធីផ្ញើសារ Telegram វាធ្វើឲ្យវាពិបាកក្នុងការវាយតម្លៃថា តើសកម្មភាព នៅថ្ងៃពុធ អាចផ្ដល់ការរំខានកម្រិតណា។

រដ្ឋាភិបាលកំពុងមានការប្រុងប្រយ័ត្នខ្ពស់ ដោយគ្រោងនឹងដាក់ពង្រាយនគរបាលចំនួន ៨០.០០០នាក់ ដើម្បីទប់ស្កាត់ការតវ៉ាដែលអាចមានមនុស្សចំនួន ១០០.០០០នាក់ និងដែលកំណត់គោលដៅអាកាសយានដ្ឋាន ស្ថានីយ៍រថភ្លើង និងផ្លូវហាយវេ ដោយមានការបិទផ្លូវ ឬសកម្មភាពនៃការបំផ្លិចបំផ្លាញ៕