ប្រធានគណៈកម្មការអឺរ៉ុប លោកស្រី Ursula von der Leyen បាននិយាយនៅថ្ងៃពុធ (ទី១០ ខែកញ្ញា) នេះថា គណៈកម្មការអឺរ៉ុបនឹងស្នើដាក់ទណ្ឌកម្មរដ្ឋមន្ត្រីអ៊ីស្រាអែលនិយមជ្រុល និងការផ្អាកដោយផ្នែកនៃកិច្ចព្រមព្រៀងសហគមន៍សហភាពអឺរ៉ុប (EU) ជាមួយអ៊ីស្រាអែល ដោយផ្តោតលើបញ្ហាទាក់ទងនឹងពាណិជ្ជកម្ម។

ជាមួយគ្នានេះ អំឡុងពេលថ្លែងសុន្ទរកថារដ្ឋសហភាពទៅកាន់ EU នៅទីក្រុង Strasbourg ប្រទេសបារាំង លោកស្រី Von der Leyen ក៏បានលើកឡើងផងដែរថា គណៈកម្មការនឹងផ្អាកការគាំទ្រទ្វេភាគីរបស់ខ្លួន ចំពោះអ៊ីស្រាអែល តែមិនប៉ះពាល់ដល់ការងារជាមួយសង្គមស៊ីវិលអ៊ីស្រាអែល និង Yad Vashem ដែលជាមជ្ឈមណ្ឌលរំលឹកដល់ការសម្លាប់រង្គាលរបស់អ៊ីស្រាអែលនោះឡើយ។

គណៈកម្មាការនេះ នៅមុននេះបានស្នើឲ្យទប់ស្កាត់លទ្ធភាពទទួលបានរបស់អ៊ីស្រាអែល សម្រាប់កម្មវិធីផ្តល់មូលនិធិស្រាវជ្រាវដ៏លេចធ្លោរបស់ប្លុក ប៉ុន្តែមិនអាចទទួលបានការគាំទ្រគ្រប់គ្រាន់ពីបណ្តាប្រទេសជាសមាជិក EU សម្រាប់ចំណាត់ការនេះឡើយ។

លោកស្រី Von der Leyen បានបញ្ជាក់ថា គណៈកម្មការនឹងធ្វើអ្វីដែលខ្លួនអាចធ្វើបាន។ ហើយប្រធានគណៈកម្មាការរូបនេះបានបន្ថែមថា ស្ថាប័ននេះនឹងបង្កើតក្រុមម្ចាស់ជំនួយប៉ាឡេស្ទីន នៅខែក្រោយ ក្នុងនោះរួមមានទាំងឧបករណ៍ ដើម្បីកសាងតំបន់ហ្កាហ្សាឡើងវិញផងដែរ៕