វិមានក្រឹមឡាំង នៅថ្ងៃពុធ (ទី១០ ខែកញ្ញា) នេះ បានបដិសេធមិនធ្វើអត្ថាធិប្បាយអ្វីឡើយ ជុំវិញសេចក្តីថ្លែងការណ៍របស់ប្រទេសប៉ូឡូញ ដែលថា ខ្លួនបានបាញ់ទម្លាក់យានដ្រូនរបស់រុស្ស៊ី នៅក្នុងដែនអាកាសប៉ូឡូញ ដោយបញ្ជាក់ថា នេះគឺជាបញ្ហាសម្រាប់ក្រសួងការពារជាតិ។

គួរបញ្ជាក់ថា ប្រទេសប៉ូឡូញបានបាញ់ទម្លាក់យានដ្រូន នៅក្នុងដែនអាកាសរបស់ខ្លួន នាថ្ងៃពុធនេះ ដោយមានការគាំទ្រដោយយន្តហោះយោធាពីសម្ព័ន្ធមិត្តណាតូរបស់ខ្លួន ដោយនេះគឺជាលើកដំបូងហើយដែលសមាជិកនៃសម្ព័ន្ធភាពយោធាលោកខាងលិចមួយនេះ ត្រូវបានគេដឹងថា បានបាញ់ទម្លាក់អាវុធ ក្នុងអំឡុងពេលមានសង្គ្រាមរបស់រុស្ស៊ី នៅអ៊ុយក្រែន។

នាយករដ្ឋមន្ត្រីប៉ូឡូញ លោក Donald Tusk បាននិយាយថា «នេះគឺជាការបង្កហេតុទ្រង់ទ្រាយធំ និងជាស្ថានភាពគ្រោះថ្នាក់បំផុតដែលយើងបានជួបប្រទះ គិតចាប់តាំងពីសង្គ្រាមលោកលើកទី២» ទោះបីជាលោកក៏បាននិយាយផងដែរថា លោក «គ្មានហេតុផល ក្នុងការជឿថា ប្រទេសកំពុងស្ថិតនៅមាត់ជ្រោះនៃការមានសង្គ្រាមក៏ដោយ»។

នៅពេលត្រូវបានសួរ អំពីយានដ្រូន និងការកត់សម្គាល់របស់លោក Tusk អ្នកនាំពាក្យវិមានក្រឹមឡាំង លោក Dmitry Peskov បាននិយាយថា៖ «ក្នុងករណីនេះ យើងមិនចង់ធ្វើអត្ថាធិប្បាយអ្វីឡើយអំពីវា ទោះតាមមធ្យោបាយណាមួយក៏ដោយ។ នេះមិនមែនជាការទទួលខុសត្រូវរបស់យើងទេ ពោលគឺវាជាតួនាទីរបស់ក្រសួងការពារជាតិ»។

លោក Peskov បានបញ្ជាក់ថា វិមានក្រឹមឡាំងមិនបានទទួលសំណើណាមួយ សម្រាប់ការទាក់ទងពីប៉ូឡូញឡើយ ប៉ុន្តែបានច្រានចោលការចោទប្រកាន់របស់សហភាពអឺរ៉ុប (EU) និងអង្គការណាតូ (NATO) ដែលថា រុស្ស៊ីបានធ្វើសកម្មភាពបង្កហេតុ។

លោក Peskov បានប្រាប់ថា» «ថ្នាក់ដឹកនាំរបស់សហភាពអឺរ៉ុប និងអង្គការណាតូ បានចោទប្រកាន់រុស្ស៊ីបង្ករឿងហេតុជារៀងរាល់ថ្ងៃ។ ដោយភាគច្រើននៃការចោទប្រកាន់នោះ មិនឃើញមានបង្ហាញអំពីអំណះអំណាងសូម្បីតែមួយ»។ 

រហូតមកដល់ពេលនេះ ក្រសួងការពារជាតិរុស្ស៊ី មិនទាន់បានធ្វើអត្ថាធិប្បាយអ្វីឡើយ អំពីឧប្បត្តិហេតុយានដ្រូន នៅប្រទេសប៉ូឡូញនេះ៕